جنوبی افریقا کے تجربہ کار اسپنر عمران طاہر نے 47 برس کی عمر میں بھی اپنی شاندار کارکردگی کا سلسلہ جاری رکھتے ہوئے ٹی ٹوئنٹی کرکٹ میں ایک اور اہم اعزاز اپنے نام کرلیا۔
کیریبین پریمیئر لیگ میں گیانا ایمیزون واریئرز کی نمائندگی کرنے والے عمران طاہر نے سینٹ لوشیا کنگز کے خلاف تباہ کن گیند بازی کرتے ہوئے محض 17 رنز کے عوض 5 کھلاڑیوں کو پویلین کی راہ دکھائی، جس کے نتیجے میں مخالف ٹیم 119 رنز پر پوری ہوگئی۔
عمران طاہر نے اپنی گھومتی ہوئی گیندوں سے سینٹ لوشیا کنگز کے بلے بازوں کو مشکلات سے دوچار رکھا اور مسلسل وکٹیں حاصل کرکے ٹیم کی بیٹنگ لائن کو سنبھلنے کا موقع نہیں دیا۔ ان کی اس غیر معمولی کارکردگی نے نہ صرف میچ کا رخ تبدیل کیا بلکہ ان کے نام ایک نیا ریکارڈ بھی درج ہوگیا۔
5 وکٹیں حاصل کرنے کے بعد عمران طاہر مردوں کی ٹی ٹوئنٹی کرکٹ میں ایک اننگز کے دوران پانچ وکٹیں لینے والے سب سے زیادہ عمر رسیدہ کھلاڑی بن گئے ہیں۔ 47 برس کی عمر میں یہ اعزاز حاصل کرنا ان کے طویل کرکٹ سفر اور فٹنس کے ساتھ ساتھ کھیل کے لیے ان کی غیر معمولی وابستگی کا بھی ثبوت ہے۔
عمران طاہر کی اس کارکردگی سے یہ بات ایک بار پھر نمایاں ہوگئی کہ عمر بڑھنے کے باوجود ان کی وکٹ حاصل کرنے کی صلاحیت اور میدان میں جوش و جذبہ بدستور برقرار ہے، جبکہ مختصر طرز کی کرکٹ میں ان کی موجودگی اب بھی حریف ٹیموں کے لیے بڑا چیلنج ہے۔
