امریکا اور ایران کے درمیان بڑھتی کشیدگی کے باعث عالمی منڈی میں خام تیل کی قیمتوں میں مسلسل چوتھے سیشن بھی اضافہ ریکارڈ کیا گیا

غیر ملکی میڈیا کے مطابق عالمی منڈی میں برینٹ خام تیل کی قیمت 100 ڈالر فی بیرل کی سطح کے قریب پہنچ گئی ہے۔

برینٹ خام تیل کے مستقبل کے سودوں کی قیمت 1.57 ڈالر، یعنی 1.6 فیصد اضافے کے بعد 99.49 ڈالر فی بیرل ہوگئی۔

دوسری جانب امریکی ویسٹ ٹیکساس انٹرمیڈیٹ (WTI) خام تیل کی قیمت 1.60 ڈالر، یعنی 1.72 فیصد اضافے سے 94.63 ڈالر فی بیرل پر پہنچ گئی۔

رپورٹ کے مطابق تیل کی قیمتوں میں تازہ اضافہ امریکا کی جانب سے ایرانی ٹینکروں پر حملوں اور اس کے ردعمل میں ایران کی جانب سے خلیج میں امریکی فوجی تنصیبات کو نشانہ بنائے جانے کے بعد ہوا۔

غیر ملکی میڈیا کا کہنا ہے کہ اگست کے آغاز سے اب تک برینٹ خام تیل کی قیمت میں تقریباً 25 فیصد اضافہ ہوچکا ہے۔