کیرول: امریکی ریاست ٹیکساس کے شہر کیرول میں ایک معجزاتی واقعہ پیش آیا جہاں ایک چھوٹا بلی کا بچہ گاڑی کے انجن کے اندر بیٹھ کر 122 کلومیٹر کا طویل اور پرخطر فاصلہ طے کرنے کے بعد بھی مکمل طور پر محفوظ رہا۔
واقعہ اس وقت پیش آیا جب پیٹرسن ہیلتھ کا ایک ملازم اپنی گاڑی لے کر دفتر پہنچا تو اسے انجن کے حصے سے بلی کے بچے کے رونے کی آوازیں سنائی دیں۔ گاڑی کا بونٹ کھولنے پر معلوم ہوا کہ ایک ننھا بلی کا بچہ وہاں موجود ہے۔
ابتدائی تحقیق سے معلوم ہوا ہے کہ یہ بچہ راکسپرنگز کے علاقے سے گاڑی کے انجن کمپارٹمنٹ میں گھس گیا تھا۔ اس دوران گاڑی نے تقریباً 122 کلومیٹر کا طویل سفر طے کیا، مگر حیران کن طور پر بلی کا بچہ حادثاتی طور پر کسی قسم کی چوٹ سے محفوظ رہا۔
ملازم نے فوری طور پر انتظامیہ کو مطلع کیا جس کے بعد کیرول اینیمل کنٹرول اور مقامی ریسکیو ٹیم کے اہلکار جائے وقوع پر پہنچ گئے۔ ریسکیو کرنے والی ٹیم نے نہایت احتیاط کے ساتھ گاڑی کی اگلی گرل کو کھولا تاکہ کسی قسم کے نقصان کے بغیر جانور کو باہر نکالا جا سکے۔
ریسکیو ٹیم نے بتایا کہ انجن کے اندر موجود یہ ننھا مسافر اپنی خوش قسمتی سے زندہ سلامت بچ گیا ہے۔ اگر گاڑی تیز رفتاری سے چل رہی ہو تو انجن کے پرزوں کی گرمی یا حرکت جانور کی جان کے لیے انتہائی مہلک ثابت ہو سکتی تھی، تاہم یہ بچہ مکمل طور پر خیریت سے رہا۔
بازیابی کے بعد جانوروں کے ریسکیو اہلکاروں نے اسے اپنی تحویل میں لے لیا ہے۔
بلی کے بچے کو طبی معائنے کے لیے اسپتال منتقل کر دیا گیا ہے جہاں اس کی صحت کی جانچ اور دیکھ بھال کی جا رہی ہے۔ ڈاکٹروں کے مطابق بلی کا بچہ اب خطرے سے باہر ہے اور اسے مناسب خوراک فراہم کی جا رہی ہے۔
