اسمارٹ فون کے لیے نیا چارجر خریدتے وقت کم قیمت کو ترجیح دینا مستقبل میں مہنگا ثابت ہوسکتا ہے، کیونکہ غیر معیاری چارجرز نہ صرف بیٹری کی کارکردگی متاثر کرسکتے ہیں بلکہ فون کے دیگر اہم حصوں کو بھی نقصان پہنچنے کا خطرہ بڑھا دیتے ہیں۔
مارکیٹ میں مختلف کمپنیوں کے تیار کردہ چارجرز دستیاب ہیں اور ان میں سے کئی اصل کمپنی کے چارجر کے مقابلے میں نمایاں طور پر سستے ہوتے ہیں۔ یہی وجہ ہے کہ کم قیمت والے غیر اصل چارجر صارفین کی توجہ حاصل کرتے ہیں، خصوصاً جب ان میں تیز رفتار چارجنگ کی سہولت بھی فراہم کی جارہی ہو۔
ماہرین کے مطابق ہر سستا چارجر لازماً خراب نہیں ہوتا، تاہم غیر معیاری یا ناقص ساخت والے چارجرز میں وہ حفاظتی پرزے اور نظام موجود نہیں ہوتے جو چارجنگ کے دوران فون کو بجلی کی غیر متوازن فراہمی سے محفوظ رکھتے ہیں۔
ایسے چارجرز مناسب اور مستحکم وولٹیج فراہم کرنے میں ناکام ہوسکتے ہیں، جس کے نتیجے میں چارجنگ کے عمل کے دوران بجلی کی فراہمی میں اتار چڑھاؤ پیدا ہوسکتا ہے۔ اس صورتحال سے فون کی بیٹری پر اضافی دباؤ پڑنے کے ساتھ چارجنگ کے برقی حصے کو بھی نقصان پہنچنے کا خطرہ بڑھ جاتا ہے۔
اسمارٹ فونز میں استعمال ہونے والی لیتھیم آئن بیٹریاں وقت کے ساتھ قدرتی طور پر اپنی کارکردگی اور گنجائش کھوتی ہیں، تاہم غیر مستحکم چارجنگ اس کیمیائی تنزلی کے عمل کو تیز کرسکتی ہے۔ نتیجتاً بیٹری کی مجموعی گنجائش کم ہونے اور فون کا پہلے کے مقابلے میں کم وقت تک چلنے کا امکان بڑھ جاتا ہے۔
ماہرین کا کہنا ہے کہ صارفین کے لیے ضروری نہیں کہ وہ اپنے فون کے ساتھ اسی کمپنی کا تیار کردہ چارجر یا کیبل استعمال کریں۔ موجودہ دور کے بیشتر اسمارٹ فونز میں یو ایس بی ٹائپ سی معیار استعمال ہوتا ہے، اس لیے کسی دوسری معتبر کمپنی کا معیاری چارجر اور کیبل بھی استعمال کی جاسکتی ہے۔
تاہم چارجر خریدتے وقت صرف کم قیمت یا تیز رفتار چارجنگ کی تشہیر کو دیکھنے کے بجائے اس کی کمپنی، معیار اور حفاظتی خصوصیات کو بھی مدنظر رکھنا چاہیے۔ معروف کمپنیوں کے معیاری چارجرز میں عموماً اضافی حفاظتی نظام موجود ہوتے ہیں جو ضرورت کے مطابق بجلی کی فراہمی کو منظم کرتے ہیں۔
موجودہ اسمارٹ فونز بھی جدید چارجنگ اور بیٹری انتظامی نظام سے لیس ہوتے ہیں، جو بیٹری کو زیادہ چارج ہونے اور درجہ حرارت میں اضافے جیسے مسائل سے محفوظ رکھنے میں مدد دیتے ہیں۔ تاہم ناقص معیار کے چارجر میں مناسب حفاظتی انتظام نہ ہونے کی صورت میں فون اور چارجر دونوں کے زیادہ گرم ہونے کا خطرہ برقرار رہتا ہے۔
خصوصاً خراب یا ناقص کیبل کے ساتھ غیر معیاری چارجر کا استعمال صورتحال کو مزید خطرناک بنا سکتا ہے، کیونکہ اس صورت میں چارجنگ کے دوران غیر معمولی حرارت پیدا ہونے سے فون کے چارجنگ حصے یا خود چارجر کو نقصان پہنچ سکتا ہے۔
اسی لیے ماہرین صارفین کو مشورہ دیتے ہیں کہ اسمارٹ فون کے لیے چارجر خریدتے وقت صرف سستی قیمت کو بنیاد نہ بنائیں۔ بہتر ہے کہ فون بنانے والی کمپنی کے معیاری چارجر یا کسی معتبر کمپنی کے تصدیق شدہ اور حفاظتی خصوصیات سے لیس چارجر کا انتخاب کیا جائے تاکہ بیٹری کی کارکردگی برقرار رکھنے کے ساتھ فون کو ممکنہ نقصان سے بھی محفوظ رکھا جاسکے۔
