پٹایا: امریکی بحریہ کا ایٹمی طاقت سے چلنے والا طیارہ بردار جہاز یو ایس ایس ابراہم لنکن مسلسل 250 دن تک کھلے سمندر میں قیام کے بعد تھائی لینڈ کے ساحلی شہر پٹایا پہنچ گیا ہے۔ اس طویل بحری سفر کے دوران جہاز پر 5 ہزار اہلکار موجود تھے۔
یاد رہے کہ یہ بحری جہاز گزشتہ برس نومبر میں سان ڈیاگو سے ایک محدود 6 ماہ کے مشن پر نکلا تھا، تاہم مشرق وسطیٰ میں ایران اور اسرائیل کے درمیان بڑھتی ہوئی کشیدگی اور امریکی فوجی حکمت عملی میں تبدیلی کے باعث اس کا قیام غیر معمولی حد تک طویل ہو گیا۔
حکام کے مطابق طویل عرصے تک سمندر کی لہروں کے درمیان رہنے والے ان ہزاروں امریکی اہلکاروں کو اب تھائی لینڈ کے ساحل پر کچھ وقت آرام کرنے کا موقع ملا ہے۔ اس غیر متوقع قیام کے دوران اہلکاروں نے اپنی پیشہ ورانہ ذمہ داریاں انتہائی مستعدی اور صبر کے ساتھ ادا کی ہیں۔
پٹایا کے مقامی تاجر طبقے میں اس آمد کے بعد خوشی کی لہر دوڑ گئی ہے۔ شہر کی معیشت گزشتہ کچھ عرصے سے سیاحوں کی کمی اور علاقائی حالات کی وجہ سے دباؤ کا شکار تھی۔ مقامی کاروباری افراد اب امریکی فوجیوں کی موجودگی سے آمدنی میں اضافے کے منتظر ہیں۔
انتظامیہ اور امریکی حکام کی جانب سے اس دورے کو پرامن رکھنے کے لیے سخت ہدایات جاری کی گئی ہیں۔ امریکی فوجیوں کو شہر کے مخصوص تفریحی مقامات، کینابس شاپس اور بعض مخصوص سمندری کھیلوں میں حصہ لینے سے سختی سے منع کیا گیا ہے تاکہ کسی قسم کا ناخوشگوار واقعہ پیش نہ آئے۔
مقامی تھائی حکام نے اس دورے کو معاشی بہتری کے لیے ایک اہم موقع قرار دیا ہے۔ انتظامیہ نے سکیورٹی کے سخت انتظامات کیے ہیں تاکہ ہزاروں امریکی اہلکاروں کی آمد کے دوران شہر کا نظم و نسق برقرار رہے اور یہ دورہ کامیابی کے ساتھ اپنے منطقی انجام کو پہنچ سکے۔
