انور شعورؔ

اس جہاں سے کہ کسی اور جہاں سے کی تھی
ابتدا ہم نے خدا جانے سے کہاں سے کی تھی
اُس نے مرضی سے پلائی تھی مئے زیست ہمیں
ہم نے درخواست کہاں پیرِ مغاں سے کی تھی
عقل گم ہے کہ ملی تھی وہ دلِ سادہ سے
یا ملاقات کسی فلسفہ داں سے کی تھی
قید میں ہونٹ بھی سلوا لیے اپنے ہم نے
بات کرنے کی جسارت نگراں سے کی تھی
عشق فرمانے کی نوبت نہیں آئی تاہم
دوستی ہم نے کئی ماہ وشاں سے کی تھی
یہ الگ بات کہ حاصل نہیں کر پائے اُسے
ہم نے اُس شخص کی خواہش دل و جاں سے کی تھی
تھی معانی سے معرّا تری تقریر شعورؔ
تُو نے پوری یہ کمی زورِ بیاں سے کی تھی

کوثر نقوی

ہوش ہوتا تو ہمیں کام یہ کر جانا تھا
زندہ رہنے کے لیے‘ آپ پہ مر جانا تھا
تو نے جو زخم دیا اُس کو تو اک عمر ہوئی
وقت مرہم ہے تو اب زخم کو بھر جانا تھا
وحشتِ عشق نہ جانے ہمیں لے آئی کدھر
کوئی بتلائے ہمیں ہم کو کدھر جانا تھا
تیرے کوچے سے پلٹنے کا قلق ہے ہم کو
خاک بن کر تیرے کوچے میں بکھر جانا تھا
ایسے عالم میں ہمیں ملتی بھی منزل کیونکر
ہم نے بس خواہشِ منزل کو سفر جانا تھا
یہ کہیں اُن کی ہی محفل تو نہیں ہے اے دل
ہم یہ کیوں بھول گئے لوٹ کے گھر جانا تھا
تو نے آنچل کو اٹھایا تو کھلا رازِ سحر
میں نے سورج کے ابھرنے کو سحر جانا تھا
ظرف میرا مرے ساقی نہ دیکھا کوثرؔ
ورنہ اب تک تو مرے جام کو بھر جانا تھا

روبینہ ممتاز روبی

کوئی اندر سے ہے کیا، کس کو پتا لگتا ہے
دیکھنے میں تو ہر اک شخص بھلا لگتا ہے
مال و دولت کے لیے خون بہا دیتے ہیں
آج تو زر ہی زمانے کا خدا لگتا ہے
جھوٹ بولوں تو زباں ساتھ نہیں دیتی ہے
سچ جو بولوں تو زمانے کو بُرا لگتا ہے
آج پھر خوف سے ہیں سہمے ہوئے برگِ چمن
آج پھر گل کوئی ٹہنی سے جدا لگتا ہے
پتّے پتّے پہ نظر آتا ہے عکسِ شبنم
آج پھر سارا چمن اشک نما لگتا ہے
اتنا آساں نہیں دنیا کو پرکھنا روبی
کھا کے ٹھوکر ہی حقیقت کا پتا لگتا ہے