ہے گھر بار جنت خواتین کی
یہ ہے سچی دولت خواتین کی
رسولِِ خدا کا یہ فرمان ہے
کرو دل سے عزت خواتین کی
ہے رنگِ بہاراں خواتین سے
نمایاں ہے عظمت خواتین کی
نظر آتی ہے مختلف شکل میں
وطن سے محبت خواتین کی
ہوں کیسے بھی حالات ہر دور میں
رہے گی ضرورت خواتین کی
پڑھیں گی اگر سیرتِ مصطفیؐ
بڑھے گی بصیرت خواتین کی
وہ رہتی ہیں مشکل میں بھی تازہ دَم
ہے کس درجہ ہمت خواتین کی
نہیں ہے کسی سے عداوت انہیں
محبت ہے فطرت خواتین کی
اگر مجھ کو تھوڑی سی فرصت ملے
میں پڑھتی ہوں سیرت خواتین کی
رفیعہؔ وسیلے سے اسلام کے
بڑھی قدر و قیمت خواتین کی
