گوگل نے مصنوعی ذہانت (اے آئی) پر مبنی گفتگو کرنے والے پروگرام کو گوگل سرچ میں شامل کرنے کا اعلان کیا ہے جسے باضابطہ طور پر گوگل آئی او کانفرنس کی تقریب میں پیش کیا جائے گا۔ یہ ایک طرح کا جدید ترین چیٹ بوٹ ہے جسے ’میگی‘ کا نام دیا گیا ہے۔ ڈویلپر نے اسے چیٹ جی پی ٹی کی طرز پر بنایا ہے۔ اس سے قبل مائیکروسافٹ نے اپنے بنگ براؤزر میں چیٹ جی پی ٹی شامل کرنے اعلان کیا تھا، تاہم اس پر عمل درآمد اب تک نہیں ہوسکا ہے۔یہی وجہ ہے کہ گوگل نے فوری طور پر میگی پر کام شروع کیا اور دوسری جانب بارڈ جیسا اے آئی منصوبہ بھی شروع کیا ہے۔ تاہم اس کی مزید تفصیلات 10 مئی کی تقریب کے بعد ہی سامنے آسکیں گی۔ دوسری جانب تجزیہ نگاروں نے کہا ہے کہ اس طرح سرچ کا دائرہ خاصا وسیع ہوسکے گا جن میں سوشل میڈیا پوسٹ، مختصر ویڈیو اور اے آئی پر مبنی گفتگو بھی شامل ہے۔وال اسٹریٹ جرنل کے مطابق گوگل چاہتا ہے کہ ویب پر روایتی طور پر لنکس، تصاویر اور ویڈیو کے بجائے اسے مزید بہتر اور انسانی روپ دیا جاسکے۔ تجزیہ کاروں کے مطابق اس سہولت کی بدولت اب ٹک ٹاک ویڈیو کے اندر سرچ کرنا بھی آسان ہوجائے گا۔ جہاں تک یوٹیوب کا سوال ہے تو وہ گوگل کی ملکیت کی وجہ سے اس منصوبے میں شامل ہے۔
دلچسپ بات یہ ہے کہ گوگل، اے آئی کو میسجنگ میں بھی استعمال کرنا چاہتا ہے جس کی تیاریاں شروع ہوچکی ہیں۔
