پاکستان ہاکی فیڈریشن کی زیرنگرانی اور پنجاب ہاکی ایسوسی ایشن کے زیراہتمام آل پاکستان کمشنر گوجرانوالہ گولڈ کپ ہاکی ٹورنامنٹ 12 تا 20 فروری اسپورٹس ایرینا،گکھڑ میں کھیلا جائے گا۔ پاکستان ہاکی فیڈریشن نے پنجاب ہاکی ایسوسی ایشن کو ایونٹ کی انتظامات کی ہدایات جاری کرنے کے ساتھ 10 صوبائی و ڈپارٹمنٹل ٹیموں کو ایونٹ میں شرکت کے دعوت نامے بھجوا دیئے ہیں، ایونٹ کو انٹرنیشنل ہاکی فیڈریشن اور پاکستان ہاکی فیڈریشن کے اصول و ضوابط کے مطابق منعقد کروانے کے لیے پاکستان ہاکی فیدریشن کی جانب سے ٹیکنیکل آفیشلز اور ایمپائرز پینل کا تقرر کیا جائے گا۔ آل پاکستان کمشنر گوجرانوالہ گولڈ کپ ہاکی ٹورنامنٹ میں پنجاب کی دو ٹیمیں، کے پی کے، سندھ، بلوچستان،آرمی، پی اے ایف، نیوی، واپڈا اور ماڑی پیٹرولیم کی ٹیمیں شرکت کریں گی۔ ایونٹ پنجاب ہاکی ایسوسی ایشن کے زیراہتمام منعقد ہوگا جبکہ ڈی ایچ اے گوجرانوالہ معاونت کرے گی۔ پاکستان ہاکی فیڈریشن کی جانب سے ٹیموں کو ایونٹ میں اپنی شرکت کی کنفرمیشن 28 جنوری تک پی ایچ ایف کو بھجوانے کی ہدایات جاری کی گئی ہیں۔
