ایک تحقیق میں معلوم ہوا ہے کہ نوجوانی میں وزن کا زیادہ ہونا 18 اقسام کے کینسر کے خطرات میں اضافہ کرسکتا ہے۔ماضی کے مطالعوں میں یہ بات معلوم ہوئی تھی کہ وہ لوگ جو زیادہ وزن یا مٹاپے کا شکار ہوتے ہیں ان کے چھاتی، گردے اور پتے جیسے مختلف کینسر میں مبتلا ہونے کے امکانات بڑھ جاتے ہیں۔اب ایک نئی تحقیق میں وزن کے زیادہ ہونے کا لیوکیمیا سے بھی تعلق سامنے آیا ہے، جبکہ وہ افراد جو تمباکو نوشی نہیں کرتے تھے ان میں بھی بلیڈر، سر اور گردن میں کینسر کے ساتھ تعلق پایا گیا ہے۔تحقیق کے مصنفین کا کہنا تھا کہ کینسر کی ان اقسام کو پہلے مٹاپے سے تعلق رکھنے والے کینسر نہیں سمجھا جاتا تھا اور مُٹاپے کے، کینسر پر اثرات کو نظرانداز کیا گیا ہے۔نیچر کمیونی کیشنز میں شائع ہونے والی اس نئی تحقیق میں محققین نے 40 برس اور اس سے کم عمر 26 لاکھ سے زائد ہسپانوی شہریوں کے ڈیٹا کا مطالعہ کیا جو 2009ء میں کینسر کا شکار نہیں تھے۔ محققین نے تحقیق میں شامل ان افراد کے زندگی بھر کے باڈی ماس انڈیکس کا جائزہ لیا۔ محققین کے مطابق ماضی کی تحقیق میں وزن اور کینسر کے درمیان تعلق جاننے کے لیے سِنگل بی ایم آئی اسکور کا استعمال کیا گیا تھا۔تحقیق میں شریک ان افراد کا نو سال تک یہ دیکھنے کے لیے معائنہ کیا گیا کہ اس دوران وہ کینسر میں مبتلا ہوئے یا نہیں۔ مطالعے کے دوران تقریباً 2 لاکھ 25 ہزار 396 افراد کینسر میں مبتلا ہوئے۔ہسپانوی محققین نے دیکھا کہ وہ افراد جو اپنے ابتدائی دورِ نوجوانی میں مٹاپے یا زیادہ وزن کا شکار تھے ان کے کینسر میں مبتلا ہونے کے امکانات زیادہ تھے۔
