اسپیس کوبرا نامی ہیکنگ گروپ نے ایسی میسجنگ ایپس بنائی ہیں جو صارف کی حساس معلومات کو بآسانی چُرا سکتی ہیں۔ ایپ کی پشت پر موجود شاطر گروہ اپنے لیے انتہائی مخصوص اہداف کا انتخاب کرتا ہے۔سائبر سیکیورٹی کمپنی ای سیٹ (ESET) کے محققین نے حال ہی میں دو ایسی میسجنگ ایپ بِنج چیٹ اور چیٹیکو کی نشان دہی کی ہے جن میں اینڈرائیڈ پر مبنی گریویٹی ریٹ (GravityRAT) یعنی ریموٹ ایکسز ٹروجن استعمال کیا جاتا ہے۔ یہ ریٹ کال لاگ، کانٹیکٹ لِسٹ، ایس ایم ایس میسج، ڈیوائس لوکیشن اور فائلز وغیرہ نکالنے کی صلاحیت رکھتا ہے۔لیکن ان دو ایپس میں کچھ صلاحیتیں ایسی بھی ہیں جو دیگر گریویٹی ریٹ میں نہیں ہیں، اور وہ یہ کہ یہ ایپس واٹس ایپ بیک اپ کو چراسکتی ہیں اور فائلز کو ڈیلیٹ کرنے کے لیے حکم موصول کرسکتی ہیں۔جس طرح سے اس میل ویئر کی تشہیر کی جا رہی ہے یہ عمل اس کمپین کو مزید منفرد بناتا ہے۔ ان ایپس کو ایپ اسٹورز سے ڈاؤن لوڈ نہیں کیا جا سکتا اور نہ ہی کبھی ان کو گوگل پلے پر کبھی اپ لوڈ کیا گیا۔ ان کو ایک مخصوص ویب سائٹ سے اکاؤنٹ کھولنے کے بعد ہی ڈاؤن لوڈ کیا جاسکتا ہے۔یہ چیز محققین کے لیے تب تشویش کا باعث بنی جب انہوں نے ویب سائٹ پر اکاؤنٹ بنانے کے لیے رسائی کی اور رجسٹریشن بند ہونے کی وجہ سے اکاؤنٹ نہ کھلوا سکے۔ اس بات سے محققین نے یہ نتیجہ نکالا کہ گروپ انتہائی مخصوص افراد کو اپنا ہدف بناتا ہے، ممکنہ طور پر ان کی لُوکیشن یا آئی پی ایڈریس دیکھ کر۔
