اگرچہ اب بھی دنیا بھر میں اسمارٹ فون سے یوٹیوب کو ٹی وی سے جوڑا جارہا ہے، لیکن اب یوٹیوب نے اس کام کو بہت آسان کردیا ہے جس کی بدولت فوری طور پر اسمارٹ فون پر چلنے والا یوٹیوب، اسکرین ٹی وی پر منتقل ہوجاتا ہے، جبکہ اسمارٹ فون کو بطور ریموٹ کنٹرول استعمال کیا جاسکے گا، اس کے لیے ضروری ہے کہ ایپ اور انٹرنیٹ سے منسلک ٹی وی دونوں ہی ایک اکاؤنٹ سے جڑے ہوں۔ اس کے بعد آپ یوٹیوب ایپ کھولیں اور “Connect” پر کلک کریں۔ اس کے بعد ٹی وی پر یوٹیوب اسکرین نمایاں ہوجائے گی۔ یوٹیوب نے اس سال اپنی ایپ میں بہت سے تجربات اور تبدیلیاں کی ہیں لیکن اس نے ’دوسری یا سیکنڈ اسکرین‘ پر اپنی توجہ مرکوز کی تھی۔ اسی طرح ٹویٹر نے بھی ایپ کو ٹی وی سے جوڑنے کی کوشش کی ہے جبکہ فیس بک بھی اس پر غور کررہا ہے۔ لیکن اب یوٹیوب نے بازی لے جاتے ہوئے ایپ میں مزید سہولیات پیدا کی ہیں۔ یوٹیوب نے اپنے بلاگ میں کہا ہے کہ اب آپ کا فون ٹی وی سے جڑسکتا ہے اور اب یوٹیوب اسکرین کو براہِ راست اسکرین سے کنٹرول کیا جاسکتا ہے اور فون اس کا ریموٹ کنٹرول بھی بن سکتا ہے۔ اس طرح ویڈیو کی تفصیلات اور کمنٹس وغیرہ پڑھنے میں بھی آسانی ہوسکتی ہے۔
