میاں منیر احمد
اسلامی تعاون تنظیم (او آئی سی) کی وزرائے خارجہ کونسل کا 17واں اجلاس ختم ہوگیا، اور ابہام شروع ہوگیا کہ اسلامی ممالک کی تنظیم افغانستان میں طالبان حکومت کو تسلیم کرنے کا فیصلہ کیوں نہیں کرسکی! یہ اجلاس خصوصی طور پر افغانستان میں انسانی بحران سے نمٹنے کے لیے اسلامی تعاون تنظیم کے چیئرمین سعودی عرب کی دعوت پر طلب کیا گیا تھا۔ اسلامی تعاون تنظیم کی وزرائے خارجہ کونسل کے 17ویں غیرمعمولی اجلاس کا اعلامیہ تمام شریک ممالک کے وفود اور مندوبین کی جانب سے پیش کیا گیا، جو درج ذیل ہے:
1۔ پُرامن، مستحکم، متحد اور خودمختار افغانستان کے لیے افغان عوام سے اظہار یکجہتی۔
2۔ اجلاس کے شرکا کا افغانستان پر اقوام متحدہ اور او آئی سی چارٹر کے تحت انسانی حقوق کی پاس داری اور عمل درآمد کے لیے زور۔
3۔ شرکا کا افغانستان میں جنم لیتے انسانی بحران پر اقوام متحدہ کے اداروں کی رپورٹس کا جائزہ۔
4۔ اجلاس میں اقوام متحدہ کے اداروں پر او آئی سی کے تعاون سے افغانستان میں امدادی سرگرمیاں جاری رکھنے پر زوردیا گیا۔
5۔ شرکا نے ازبکستان کے اقوام متحدہ کے تحت لاجسٹک مرکز تعمیر کرنے کے اقدام کا خیرمقدم کیا۔
6۔ اجلاس میں عالمی برادری سے افغانستان کے شہریوں اور افغان پناہ گزینوں کو پناہ دینے والے ممالک کی فوری امداد کا مطالبہ۔
7۔ شرکا نے اتفاق کیا کہ عالمی برادری اور اقوام متحدہ کی سیکورٹی کونسل کی عالمی پابندیاں انسانی امداد کی راہ میں رکاوٹ نہیں بننی چاہئیں۔
8۔ اجلاس میں اتفاق کیا گیا کہ افغانستان سے عالمی برادری کا مسلسل رابطہ رکھنے کا مطالبہ کیا جائے تاکہ افغان عوام کے لیے انسانی امداد کی فراہمی کو یقینی بنایا جا سکے۔
9۔ شرکا نے اتفاق کیا کہ او آئی سی افغان عوام کو انسانی امداد فراہم کرنے کے عمل میں کلیدی کردار ادا کرے گی۔
10۔ شرکا کی جانب سے او آئی سی جنرل سیکرٹریٹ کو کابل میں او آئی سی کے مشن کو اس حوالے سے مالی اور لاجسٹک اقدامات اٹھانے کی ہدایت۔
11۔ شرکا نے اتفاق کیا کہ اس بات کو تسلیم کیا جائے گا کہ افغانستان کو سخت مشکلات کا سامنا ہے اور ان مسائل کو حل کرنے کے لیے قانونی بینکنگ سیکٹر تک آسان رسائی پر توجہ دی جائے گی۔
12۔ اجلاس میں اتفاق کیا گیا کہ معاشی بحران کو روکنے کے لیے افغانستان کو معاشی وسائل تک رسائی دینے، منجمد اثاثوں کی بحالی کے اقدامات کی اہمیت پر زور دیا جائے گا۔
13۔ اجلاس میں فیصلہ کیا گیا کہ افغانستان کے لیے ایک انسانی ٹرسٹ فنڈ قائم کیا جائے گا جو اسلامی ترقیاتی بینک کے ماتحت ہوگا۔
14۔ شرکا نے اتفاق کیا کہ او آئی سی جنرل سیکرٹریٹ، اسلامی ترقیاتی بینک اور انسانی ٹرسٹ فنڈ کے تعاون سے اقوام متحدہ معاشی وسائل اور انسانی امداد کی فراہمی کو یقینی بنائے گا اور اس حوالے سے حکمت عملی وضع کرے گا۔
15۔ اجلاس میں اسلامی ترقیاتی بینک سے درخواست کی گئی کہ وہ سال 2022ء کی پہلی سہ ماہی تک انسانی ٹرسٹ فنڈ فعال کرنے کو یقینی بنائے۔
6۔ اجلاس میں اتفاق کیا گیا کہ رکن ممالک، اسلامی مالیاتی ادارے، عطیہ دہندگان اور دیگر بین الاقوامی شراکت دار افغانستان کے لیے ہیومنٹیرین ٹرسٹ فنڈ کے ساتھ ساتھ افغانستان کو انسانی امداد فراہم کرنے کا اعلان کریں۔
17۔ فیصلہ کیا گیا کہ او آئی سی جنرل سیکرٹریٹ عالمی ادارۂ صحت اور دیگر متعلقہ اسٹیک ہولڈرز کے ساتھ ویکسین کے ساتھ ساتھ دیگر طبی سامان، تکنیکی اور متعلقہ امداد کی افغانستان کے لوگوں تک فراہمی میں مدد کرے گا۔
18۔ اجلاس افغانستان فوڈ سیکورٹی پروگرام شروع کرنے کا فیصلہ کرتا ہے اور اسلامک آرگنائزیشن فار فوڈ سیکورٹی (IOFS) سے درخواست کرتا ہے کہ جب ضروری ہو، تنظیم کے غذائی تحفظ کے ذخائر کی صلاحیت کو استعمال کرتے ہوئے اس سلسلے میں ضروری اقدامات کیے جائیں۔
19۔ او آئی سی کے رکن ممالک، بین الاقوامی عطیہ دہندگان، اقوام متحدہ کے فنڈز اور پروگرامز اور دیگر بین الاقوامی اداروں کی حوصلہ افزائی کرتے ہیں کہ وہ افغانستان فوڈ سیکورٹی کو یقینی بنائیں۔
20۔ او آئی سی کے سیکرٹری جنرل سے افغانستان کے ساتھ ساتھ پڑوسی ممالک میں افغان پناہ گزینوں کو ضروری انسانی اور اقتصادی امداد فراہم کرنے کے لیے ڈونر مالیاتی اداروں کے ساتھ مشغول ہونے کے لیے اپنے مطالبے کا اعادہ کرتا ہے۔
21۔ رکن ممالک، بین الاقوامی برادری بشمول اقوام متحدہ، بین الاقوامی تنظیموں، اور بین الاقوامی مالیاتی اداروں سے فوری طور پر اپیل کرتے ہیں کہ وہ پالیسی ٹولز کے طور پر افغانستان کے لیے ہر ممکن اور ضروری بحالی، تعمیرنو، ترقی، مالی، تعلیمی، تکنیکی اور مادی امداد فراہم کرتے رہیں۔
22۔ اجلاس افغانستان میں دہشت گردی سے نمٹنے کی اہمیت کا اعادہ کرتا ہے اور اس بات کو یقینی بناتا ہے کہ افغانستان کی سرزمین کسی انتہا پسند گروہ یا تنظیم کے ذریعے ایک پلیٹ فارم یا محفوظ پناہ گاہ کے طور پر استعمال نہ ہو۔
23۔ اجلاس افغانستان سے تمام دہشت گرد تنظیموں بالخصوص القاعدہ، داعش اور اس سے وابستہ تنظیموں، ای ٹی آئی ایم اور ٹی ٹی پی کے خلاف ٹھوس اقدامات کرنے کا مطالبہ کرتا ہے۔
24۔ اجلاس اس بات کی توثیق کرتا ہے کہ افغانستان میں امن، سلامتی اور استحکام، تمام افغان مہاجرین، اور اندرونی طور پر بے گھر افراد کی محفوظ اور باوقار واپسی اور افغانستان کی ترقی میں اپنا تعمیری کردار ادا کرنے میں بھی معاون ثابت ہوگا۔
25۔ اجلاس بین الاقوامی برادری پر زور دیتا ہے کہ وہ افغانستان میں امن اور استحکام کی کوششوں کو بحال کرنے کے لیے، ملک کے اندر اور باہر اشتعال انگیزی کے امکان اور بگاڑنے والوں کے کردار کے خلاف محتاط رہے۔
26۔ اجلاس افغان حکام سے مطالبہ کرتا ہے کہ وہ ایک روڈ میپ تیار کرکے تمام افغانوں بشمول خواتین اور لڑکیوں کی افغان معاشرے کے تمام پہلوؤں میں شرکت کو تقویت دیں۔
27۔ اجلاس دہشت گردی، منشیات، اسمگلنگ، منی لانڈرنگ، منظم جرائم، اور بے قاعدہ نقل مکانی سے درپیش چیلنجوں سے نمٹنے کے لیے افغانستان کے متعلقہ ریاستی اداروں کی ضروری صلاحیت کی تعمیرنو کے لیے ٹھوس کوششوں کی ضرورت پر زور دیتا ہے۔
28۔ اجلاس میں فیصلہ کیا گیا کہ او آئی سی کے اسسٹنٹ سیکرٹری جنرل برائے انسانی امداد و ثقافت و امور خانہ داری سفیر طارق علی بخیت کو افغانستان کے لیے او آئی سی کے سیکرٹری جنرل کا خصوصی نمائندہ تعینات کیا جائے گا۔
29۔ ممتاز مذہبی اسکالرز اور علماء کے ایک وفد کا اہتمام کیا جائے گا جس کی قیادت انٹرنیشنل اسلامک فقہ اکیڈمی اور دیگر متعلقہ مذہبی ادارے کریں۔ وفد افغانستان کے ساتھ اہم مسائل پر بات چیت کرے گا جیسے کہ رواداری سمیت اسلام میں اعتدال، تعلیم تک مساوی رسائی اور اسلام میں خواتین کے حقوق۔
30۔ اسلامی ترقیاتی بینک اور افغانستان کے لیے اسلامی تعاون تنظیم کے سیکرٹری جنرل کے خصوصی ایلچی اس قرارداد پر عمل درآمد کے لیے کیے گئے اقدامات کے بارے میں وزرائے خارجہ کی کونسل کے 48ویں اجلاس میں رپورٹ پیش کریں۔
31۔ اجلاس او آئی سی کے سیکرٹری جنرل سے درخواست کرتا ہے کہ وہ 48 ویں اجلاس میں ایک رپورٹ پیش کریں جس میں افغانستان میں انسانی اور معاشی صورت حال سے نمٹنے کے لیے اقدامات کی نشاندہی کی گئی ہو۔
