غیرملکی میڈیا رپورٹس کے مطابق گوگل، مائیکروسوفٹ اور آئی بی ایم کے اہم عہدوں پر کام کرنے والے بھارتیوں کے بعد اب سماجی رابطے کی ویب سائٹ ٹوئٹر کے نئے چیف ایگزیکٹو آفیسر (سی ای او) بھی بھارتی نژاد پراگ اگروال بن گئے۔
بھارتی نژاد امریکی پراگ اگرول امریکی ٹیکنالوجی ایگزیکٹو اور ٹوئٹر کے موجودہ چیف ٹیکنالوجی آفیسر ہیں۔
پراگ اگروال نے انڈین انسٹی ٹیوٹ آف ٹیکنالوجی (آئی آئی ٹی) ممبئی سے بی ٹیک کمپیوٹر سائنس اور انجینئرنگ کی تعلیم حاصل کی، اور اسٹینفورڈ یونیورسٹی سے پی ایچ ڈی کیا ہے۔
دنیا کی معروف کمپنیوں میں سی ای او کی حیثیت سے کام کرنے والے بھارتیوں میں گوگل کے سی ای او سندرپیچائی، مائیکروسوفٹ کے سی ای او ستیا ناڈیلا، اور آئی بی ایم کمپنی کے سی ای او اروند کرشنا شامل ہیں۔
اس سے قبل بانی جیک ڈورسی نے فوری طور پر سی ای او کے عہدے سے دست بردار ہونے کا اعلان کیا تھا۔ جیک ڈورسی کا اپنے بیان میں کہنا تھا کہ ٹوئٹر چھوڑنے کا فیصلہ اس لیے کیا ہے کیونکہ یقین ہے کہ کمپنی اپنے بانیوں کی مدد سے مزید آگے بڑھنے کے لیے تیار ہے۔
