کراچی پریس کلب میں چینی سفارت کار کراچی میں مقیم قونصل جنرل مسٹر لی بی جیان کلب کی دعوت پر میٹ دی پریس سے خطاب کے لیے تشریف لائے جہاں کلب کے عہدیداران اور موجود صحافیوں نے ان کا پرتپاک استقبال کیا، انہوں نے میٹ دی پریس سے خطاب کیا، صحافیوں کے تندوتیز سوالوں کے جواب خوشگوار موڈ میں تفصیل سے دیے۔ انہوں نے کہاکہ پاکستان اور چین اس وقت مشکل حالات سے گزر رہے ہیں، کورونا وائرس سے چین کے صرف دو شہر متاثر ہوئے ہیں اور اس سے ہزاروں لوگ متاثر ہوئے ہیں، ہم نے ہزاروں افراد کے ٹیسٹ سیمپلز لیے ہیں۔ اس وائرس سے متعلق بہت سے معلومات ہمیں حاصل ہوچکی ہیں ہم وائرس سے نمٹنے کے لیے ہر ممکن اقدامات کررہے ہیں، چین کے متعد شہروں میںرہنے والے لوگ مکمل طور پر محفوظ ہیں اور وہاں کوئی بھی اس مرض کی زد میں نہیں آیا اگر یہ وائرس پھیل جاتا تو صورت حال خراب ہوسکتی تھی، یہ وائرس اب ہمارے کنٹرول میں ہے۔ پاکستانی نوجوانوںکی بڑی تعداد چین میں تعلیم حاصل کررہی ہے ہم نے تمام پاکستانیوں کو حفاظتی اشیا فراہم کی ہیں اور ان کی مکمل دیکھ بھال کی جارہی ہے۔ پاکستان نے چین سے اپنے طلبا کو واپس نہ بلانے کا ایک مشکل لیکن بہترین فیصلہ کیا۔ کشمیر سے متعلق انہوں نے کہاکہ ہم اقوام متحدہ کی قراردادوں کے مطابق کشمیر کا حل چاہتے ہیں۔ انہوں نے کہاکہ چین میں مسلمان بالکل محفوظ ہیں ہم ان کی تربیت کے لیے اہم کام کررہے ہیں۔ ایف تی اے سے متعلق انہوں نے کہاکہ پاکستان اب بہت سی اشیا چین سے منگواسکتا ہے جوکہ نہایت منافع بخش اور سستی ہوں گی۔ ایف ٹی اے سے 5سے 6 بلین کا فائدہ ہوگا اس کے ذریعے پاکستان کی چین کو کی جانے والی برآمدات میں بھی اضافہ ہوگا کیونکہ چین ایک بڑی منڈی ہے۔ انہوں نے کہاکہ مختلف اشیا کے ٹیکس کے معاملات کو دیکھنا ہوگا اس معاہدے سے بزنس کمیونٹی کو فائدہ ہوگا ہم پاکستان کی بزنس کمیونٹی کی بھرپور مدد کررہے ہیں۔
پاکستان کی حکومت کو بھی معاشی ترقی کے لیے اقدامات کرنا ہوں گے، پاکستان کو معاشی طور پر دوبارہ کھڑا کرنا حکومت وقت کی ذمہ داری ہے۔ انہوںنے کہاکہ دنیا بدل رہی ہے ہمیں نت نئے چیلنجز سے نمٹنے کے لیے تیار ہونا چاہیے۔
سی پیک پر گفتگو کرتے ہوئے انہوں نے کہاکہ موجودہ حکومت نے کوئی پالیسی تبدیل نہیں کی ہے۔ ہم سی پیک سے متعلقہ علاقوں کے لوگوں کو بہتر سہولتیں فراہم کررہے ہیں ان علاقے کے لوگوں کو روزگار کی فراہمی کے لیے بھی اقدامات کیے جارہے ہیں۔ انہوں نے کہاکہ گوادر کا مستقبل میں ایک الگ مقام ہوگا، گوادر اور اس کے گرد و نواح کے علاقوں میں صاف پانی پہچانا ہمارا مقصد ہے۔ ان کی بہتر زندگی کے لیے مزید اقدامات کرنا ہوں گے۔ کراچی سرکلر ریلوے کے بارے میں انہوں نے کہاکہ سرکلر ریلوے کی بحالی ایک اچھا اقدام ہے اس سے کثیر آبادی کو ٹرانسپورٹ کی بہترین سہولیات فراہم ہوں گی۔
مسٹر لی بی جیان نے کراچی پریس کلب کی نومنتخب عہدیداران کو مبارک باد دیتے ہوئے کہاکہ پاکستان میں صحافیوں کو بہت سی مشکلات درپیش ہیں، میڈیا نے دونوں ممالک کی دوستی کو بہتر سپورٹ کیا ہے ہم صحافیوں کو چین آنے کی دعوت دیتے ہیں اور یہ تبادلہ دونوں طرف سے ہونا چاہیے، میں کراچی پریس کلب کو دعوت دیتا ہوں کہ وہ اپنا وفد وہاں بھیجے۔ کراچی کے موسم کا ذکرکرتے ہوئے انہوں نے کہاکہ کراچی کا موسم بہت شاندار اور دلکش ہے، یہاں کے کھانے بہت لذیز ہیں، سموسے کھاکر مجھے بہت اچھا لگتا ہے۔ کراچی میں گیس کے اخراج سے متاثرہ افراد سے اظہار ہمدردی کرتے ہوئے انہوں نے کہاکہ ہم اس صورت حال میں پاکستان کی بھرپور مدد کے لیے تیار ہیں یہ ایک دوسرے کا ہاتھ تھامنے کا وقت ہے۔ چین معاشی طور پر ایک بڑا ملک ہے ہماری انڈسٹری ملک کو ترقی کی جانب گامزن کرنے کی جدوجہد کررہی ہے۔ اس موقع پر کلب کے صدر امتیاز خان فاران، سیکریٹری ارمان صابر نے بھی خطاب کیا اور معزز مہمان کو گلدستہ، اجرک اور ٹوپی کے تحائف پیش کیے۔ لی بی جیان نے جم میں سیکریٹری پریس کلب کے ساتھ ٹینس بھی کھیلی اور صحافیوں کے ساتھ خوشگوار موڈ میں سیلفیاں بھی بنوائیں۔
