“ماں ! رانا کی طرح کمانے میں کیا حرج ہے؟۔۔۔تجھے پیسے چاہیئں وہ تجھے مل جائیں گے ۔”
“مجھ سے ضد نہ کر۔۔۔جیسا کہتی ہوں سن لے۔۔۔۔ پیسے ملیں گے مگر کتنے؟ اتنے نہیں جتنا تو ابھی کماتا ہے۔۔”
“ماں! میں نے کہہ دیا میں تیرے ساتھ نہیں جاؤں گا ۔۔۔”
“پھر کہاں جاۓ گا؟ بھوکا مرے گا؟”
“ہاں مر جاؤں گا۔۔میں نہیں کروں گا یہ۔۔۔مجھے رانا کی طرح پیسا چاہیے”
“تجھے اتنا شوق کس نے ڈال دیا؟ یوں ہڈیاں توڑنا آسان ہے۔۔۔؟ اور بدلے میں اتنی کم رقم! تیرے باپ کو چرس کے لیے روز پیسہ چاہیے۔۔۔کیسے بھروں گی میں۔؟”
٭۔۔۔۔۔۔۔٭
رانا اکیلا ہی تھا۔۔وہ مجھ سے کچھ سال بڑا تھا۔۔۔ میری اور اس کی دوستی کسی جگہ یا واقعے سے منسوب نہ تھی۔۔ہم نے آنکھ کھولی تومحلے میں ایک دوسرے کو کھیل کے لیےپایا۔۔ہم نے گلی گلی لکڑی سے پہیوں کو چلایا۔۔آتے جاتے لوگوں کو تنگ کیا۔۔پتھروں سے کھیلا۔۔اور ساتھ ہی راہ چلتے متوسط طبقے کے لوگ دیکھے تو ہاتھ پھیلالیے۔۔
دن یوں ہی گزرے اور جانے کب ہم تیرہ،چودہ سال کی عمروں کو پہنچے ۔۔۔ایک روز میں،رانا اور گلی کے تین لڑکے بھیک کے پیسے جمع کرکے گول گپے کھانے گئے۔۔۔۔ گول گپے والے نے ہمیں دیکھا تو بھگانے لگا۔۔رانا غصے کا تیز تھا۔۔کہنے لگا ” پیسے دے کر کھائيں گے،پانچ پلیٹیں دو۔۔۔”۔۔یہ کہہ کر پانچ پلیٹوں کے پیسے جمع کیے اور گول گپے والے کے سامنے کیے۔۔۔ معلوم نہیں شاید اتوار کا دن تھا۔۔اس لیے بچوں کا رش نہ تھا۔۔۔دوپہر کے سناٹے میں اس کے ٹھیے پر بھی ویرانی تھی۔۔۔شاید یہی سوچ کر اس نے پیسے لیے اور پلیٹیں بنانے لگا۔۔۔
کھا پی کر ہم کھڑے ہوۓ تو گول گپے والے نے کہا ” تم لوگ مانگتے کیوں ہو؟ کوئی کام کیوں نہیں کرتے؟”۔۔۔ رانا نے کہا “کس نے کہا ہم محنت نہیں کرتے۔۔ سڑکوں اور فٹ پاتھوں پر تو بیٹھ کر دیکھو۔۔۔ لوگوں کی دھتکاریں سنو۔۔یہ محنت نہیں؟ گول گپے والا بھلا آدمی لگتا تھا۔۔اس نے بےزاری کے بجاۓ نرم لہجے میں کہا ” روزی وہ جو عزت سے ملے۔۔ یوں در در کی ٹھوکریں کھانا۔۔ لوگوں کے آگے ہاتھ پھیلانا۔۔روزی نہیں۔۔۔”رانا بہت حاضر جواب اور ہم میں چیتا لڑکا تھا۔۔۔مگر گول گپے والے کی اس بات پر کچھ نہ کہا اور چل دیا۔
٭۔۔۔۔۔۔۔٭
تین چار دن بعد میں نے صبح صبح رانا کو دیکھا۔۔۔وہ نہا دھو کر ۔۔۔۔قریب مدرسے کے بچے کا دیا ہوا سوٹ پہن کر کھڑا تھا۔۔ میں نے کہا ” بھیک تُو آج اس حلیے میں مانگے گا۔۔؟ اور یہ نیا جوڑا کیوں چڑھا رکھا ہے؟”۔۔۔۔۔ “میں آج تمھارے ساتھ نہیں جاؤں گا۔۔۔۔۔میں بازار جارہا ہوں۔۔۔آکر بتاؤں گا”۔ یہ کہہ کر وہ چل دیا اور میں ماں اور منّی کے ساتھ بازار کے سامنے والی مخصوص جگہ جیسے میری ماں ہماری روزی کا ٹھیہ مانتی تھی۔۔ وہاں کو چل دیا۔۔۔
شام میں بازار میں ہی تھا کہ سامنے سے رانا آتا دیکھائی دیا۔۔ میں نے کہا۔۔” کہاں تھا سارا دن؟” کہنے لگا “روزی کمانے گیا تھا”۔۔۔۔۔۔۔۔ “اچھا تو ہم سے الگ ڈیرہ ڈھونڈ لیا؟”۔۔۔ اس نے کہا ” ہاں کل لے چلوں گا تجھے دکھانے”۔۔۔”دیکھ لیں گے تیرا ڈيرہ بھی۔۔ برسوں کے میری ماں کے اس ڈیرے سے اچھا ہے کیا۔۔۔! ابھی تو رات ہونے میں وقت ہے تو کدھر چلا؟” رانا نے ہنستے ہوۓ کہا۔۔۔”میرے ڈیرے کا کام ختم میں گھر چلا۔۔”
٭۔۔۔۔۔۔۔٭
اگلے روز میں نے ماں کو کہا” ماں!آج میں رانا کے ساتھ جاؤں گا۔۔اُدھر ہی بیٹھ جاؤں گا ۔۔اس کے بغیر سارا دن بور ہوا تھا کل۔۔۔” “چلا جا مگر صرف شغل نہ کرنا پانچ سو سے کم لایا تو خیر نہیں۔۔!
رانا کے ڈیرے کو دیکھ کر میں کبھی حیران آنکھوں سے رانا کو دیکھتا تو کبھی اس کے ڈیرے ۔۔۔وہ ڈیرہ ڈیرہ نہیں بلکہ اسی گول گپے والے کی دوکان تھی۔۔مجھے کرسی پر بیٹھا کر رانا نے گول گپے والے کو سلام کیا۔۔۔اور دوکان لگانے لگا۔۔۔برتنوں کو اس کے ٹھیے پر سجایا پھر بالٹی میں پانی لا کر رکھا۔۔میں نے کہا “اِدھر آ۔۔۔” کہنے لگا “کیسا لگا۔۔۔اپنے بھائی کا ڈیرہ؟ آج سے تیرا رانا یہیں آۓ گا روز۔۔۔!” ” تیرہ دماغ تو خراب نہیں ہے؟۔۔اِدھر کچھ نہیں ملے گا۔۔کچھ ہزار کے نوٹ ملیں گے اور تو دن بھر محنت کرے گا۔۔۔۔۔۔۔۔”
“بھئی ! میں نے یہیں ڈیرہ کرلیا ہے۔۔۔تجھے جو اچھا لگے کر۔۔۔!!” میں کہاں رانا کو اس کی بات سے ہٹانے والا تھا۔۔ خاموش رہا اور اپنی ماں کے ڈیرے کی طرف چل دیا۔۔۔
رات واپسی پر میں نے ماں کو بتایا تو ماں نے کہا ” ضرور گول گپے والے نے بہکایا ہوگا۔۔۔۔تو نہ جانا اس طرف۔۔!”۔۔ میں نے کچھ نہ کہا اور تھکاوٹ کے سبب جلد نیند کے آغوش میں چلا گیا۔۔۔
٭۔۔۔۔۔۔٭
سردیوں کی رات تھی۔۔۔ہوا سے پتوں کے ہلنے کی سرسراہٹ اور کتوں کے بھوکنے کی آواز صاف سنائی دے رہی تھی۔۔۔۔ میرے برابر میں ایک بدحال عورت جیسے میں کہتا تھا۔۔خواب کی وادی میں تھی مگر مجھے نیند نہیں آرہی تھی۔۔۔میرے دماغ میں صرف رانا سوار تھا۔۔۔ اس کے بغیر میرا کچھ دل نہ چاہتا کرنے کو۔۔رات کو بس رانا سے ملتا اور اپنی جھگی میں سونے چلا جاتا !
ایک روز مجھے بخار تھا۔۔میں ماں کے ساتھ نہ گیا تھا۔۔شام کو دیکھا رانا آرہا تو بخار کے باوجود ہمت کرکے جھگی سے باہر آیا۔۔۔۔ رانا کے ہاتھ میں حلیم کی دو تھیلیاں تھیں۔۔کہنے لگا۔۔”آ جا!” میں نجانے کیوں آنکھیں پھاڑے اسے دیکھے چلے جارہا تھا۔۔ رانا نے کہا ” کیا ہوا؟ آج طبیعت ٹھیک نہیں جو گھر پر ہر؟” میں نے کہا ” ہاں” رانا کہنے لگا۔۔”معلوم ہے! چاچا بڑا اچھا آدمی ہے ۔۔روز کچھ گول گپے مجھے کھانے کو دیتا ہے۔۔ اور ساتھ ہی شام کو نکلتے ہوۓ پچاس روپے۔۔اور مہینہ ہوگا تو کہہ رہا تھا دو ہزار دے گا۔۔۔میں نے کہا ” مگر ڈیرے پر تو ہم زیادہ کماتے ہیں” “ہاں ! مگر میں ایسے ہی خوش ہوں۔۔تو نے دیکھا تھا۔۔۔ جب ہم گول گپے کھانے کوگئے تھے تو وہ کیسے عجیب طرح بھگا رہا تھا۔۔بس یہی چیز بری لگتی ہے۔۔اب سارا دن کام کرتا ہوں ۔۔مگر دل خوش ہے۔۔ آ جا حلیم کھالے۔۔گرم گرم ہے،،میں سےبھوکا تھا۔۔پھر رانا سے کسی تکلف کا رشتہ نہ تھا۔۔سو حلیم کھانے بیٹھ گیا۔۔
٭۔۔۔۔۔۔۔٭
ملک تین دن سے ہڑتال کے باعث بند تھا۔۔منّی بیمار تھی ماں مجھے منّی کےپاس چھوڑ کر گئی تھی۔۔لوٹی تو میں نے کہا۔۔” ماں!منّی بھوکی ہے۔۔روپیہ دے۔۔میں دودھ لے آتا ہوں۔۔” ماں نے کہا۔۔”آج کم ہی ملا ہے۔۔” یہ کہہ کو دوپٹے کے پلو سے پیسے نکالنے لگی۔۔اتنے میں ایک آدمی آیا جو ہماری جھگی میں ہی رہتا تھا اور ماں سے پیسے چھینے لگا۔ماں نے کہا ” یہ تیری بھی بیٹی ہے۔۔دودھ نہ دیا تو مر جاۓ گی۔۔” مگر اس آدمی کو جسے ہماری ماں ہمارا باپ بتاتی تھی۔۔صرف چرس کی دھن سوار تھی۔۔اسی نشے کی وجہ سے اس نے دو جھانپڑ ماں کو مارے اور پیسے لے کر چلا گیا۔۔میں فوراً جھگی سے باہر بھاگا۔۔۔ماں نے پیچھے سے آواز لگائی مگر میں نہ رکا۔۔اور رانا کی جھگی میں چلا گیا۔۔رانا سو رہا تھا۔۔میں نے کہا “رانا کچھ پیسے چاہئیں۔۔منّی کے لیے۔۔”۔۔رانا نے کہا ” ڈیر سو روپے ہوں گے۔۔۔” رانا نے نکال کر دیئے اور میں دودھ کی دوکان کی طرف چل دیا۔۔گھر آکر ساری بات ماں کو بتائی۔۔ماں نے رانا کو کل پیسے واپس کرنے کو کہا۔۔! اس رات میں اور ماں بھوکے پیٹ سوگئے۔”
٭۔۔۔۔۔۔۔۔٭
زندگی رانا کے بغیر رک سی گئی تھی۔۔ میرے پاس بھیک کے جمع ہوۓ پیسے تو ہوتے مگر رانا نہ ہوتا تو میں نہ گولا گنڈا کھاتا نہ بوتل پیتا۔ میں ساری دنیا سے بےزار اور پریشان تھا۔۔ جبکہ رانا زندگی کے اس موڑ پر بے حد خوش دیکھائی دیتا۔۔ میں سوچتا اس کے پاس مجھ سے کم پیسا ہوتا ہے۔۔روز پچاس روپے ملتے ہیں پھر بھی خوش دیکھائی دیتا ہے۔۔
ایک رات میں اور رانا جھگی کے باہر بیٹھے تھے۔۔میں نے اس سے دل کے سارے سوال کر ڈالے۔۔رانا نے کہا۔۔”سن ! تجھے اتنے سوال ہیں تو چل میرے ساتھ، دو دن کام کرکے دیکھ! کام مشکل ہے مگر دل راضی۔۔۔” میں نے کہا “مگر ماں؟”…کہنے لگا “اس کو کہہ دے نئے فٹ پاتھ پر لڑکوں کے ساتھ بیٹھنے جارہا ہوں “.. میں نے کہا “وہ نہیں مانیں گی…” کہنے لگا “یہ تیرا کام ہے”
*…………………….*
اگلے دن ماں کو بہلا پھسلا کر میں رانا کے ٹھیے پر گیا۔۔رانا نے کرمو چاچا کو میرا بتایا کہ نیا آیا ہے۔۔اور رانا مجھے جانتا ہے۔۔۔چاچا نے کہا۔۔” بیٹے ۔۔تم بے شک جانتے ہو۔۔مگر میں ہر ایک کو نہیں رکھ سکتا اور سب سے بڑی بات میرے پاس ایک سے زیادہ بندے رکھنے کی گنجائش نہیں۔۔” میں نے شکستہ اور ٹوٹا دل لے کر رانا کو دیکھا۔۔گویا ” بھائی میں چلا اپنی منزل تو ادھر بیٹھ۔۔” رانا نے جیسے میرا چہرہ پڑھ لیا تھا۔۔ کہنے لگا “رک۔ ساتھ بریانی والے کی دوکان ہے۔۔ اسے لڑکوں کی ضرورت ہے۔۔۔” یہ کہہ کر مجھے بریانی والے کے پاس لے گیا۔۔
بریانی والے کے پاس میں نے دو ٹب برتنوں کے دھوۓ۔۔جب جانے کے لیے کھڑا ہوا تو بریانی والے نے ہاتھ میں سو روپے کا نوٹ رکھ دیا ۔۔۔ میں نے سوچا۔۔۔۔۔ رانا تجھے ان پیسوں میں ملتی ہے خوشی! اور دل ہی دل میں رانا سے شکوے کرنے لگا۔۔راستے میں خیال آیا ماں کو کیا بتاؤں گا۔۔!اسی فکر میں گھر پہنچا۔۔ گھر جاکر بھی ماں کو منانے کی ترکیبیں سوچتا رہا۔۔مگر کم عمر تھا اس لیے کچھ نہ سوجھا۔۔ ماں آئی تو ساری کہانی کہہ ڈالی۔۔ پھر ماں کا غصہ۔۔ مجھے یاد ہے۔۔ وہ غربت کے طعنے اور رانا کو ملامت۔۔
اگلے روز صبح اٹھا تو سیدھا اپنے ٹھیے کو گیا۔۔۔رانا ٹھیے پر آیا اور کہا “بریانی والے سے بات کی تھی تیرے لیے تو ایک دن میں بھاگ آیا۔۔ میں نے کہا ” سو روپے روز میں میرا گزارا نہیں۔۔” رانا نے کہا ” چاچا کہتا ہے۔۔تھوڑے کو زیادہ کرنا اوپر والے کا کام ہے۔۔ بس ہم کم مگرصحیح طرح کمائیں۔۔” میں نے کہا “تو مجھے الجھن میں نہ ڈال۔۔۔اور جا اپنے ٹھیے پر اور مجھے یہیں رہنے دے۔۔”
٭۔۔۔۔۔۔۔٭
دن گزرتے گئے۔۔میں اپنی روش پر گامزن تھا۔۔مگر دل پر بوجھ تھا۔۔رانا کی باتوں کا بوجھ۔۔!۔۔۔ عزت کی روزی۔۔ ،اوپر والے کا برکت دینا۔۔ یہ وہ الفاظ تھے جو رانا۔۔۔ چاچا سے سنتا پھر مجھے سناتا۔۔۔۔۔ میں ماں سے بولتا مگر وہ مجھے کہتی تو رانا کی باتوں میں نہ آیا کر۔۔میں اسی کشمکش میں رہتا۔۔ ایک روز تنگ آکر ماں کو کہا “ماں ! رانا کی طرح کمانے میں کیا حرج ہے؟۔۔۔تجھے پیسے چاہیئے وہ تجھے مل جائیں گے ۔”
“مجھ سے ضد نہ کر۔۔۔جیسا کہتی ہوں سن لے۔۔۔۔ پیسے ملیں گے مگر کتنے؟ اتنے نہیں جتنا تو ابھی کماتا ہے۔۔”
“ماں! میں نے کہہ دیا میں تیرے ساتھ نہیں جاؤں گا ۔۔۔”
“پھر کہاں جاۓ گا؟ بھوکا مرے گا؟”
“ہاں مر جاؤں گا۔۔میں نہیں کروں گا یہ۔۔۔مجھے رانا کی طرح پیسا چاہیے”
“تجھے اتنا شوق کس نے ڈال دیا؟ یوں ہڈیاں توڑنا آسان ہے۔۔۔؟ اور بدلے میں اتنی کم رقم! تیرے باپ کو چرس کے لیے روز پیسہ چاہیے۔۔کیسے بھروں گی میں؟”
٭۔۔۔۔۔۔۔٭
ماں کو جو دھمکی میں کئی روز سے دے رہا تھا آج اس پر عمل کرنے کے ارادے سے اٹھا تھا۔۔ بریانی والے کے پاس گیا۔۔اور پچھلی بار کے رویے پر معافی مانگی۔۔ قسمت اچھی تھی کہ وہ مان گیا اور مجھے کام پر رکھ لیا۔
ماں نے شروغ شروع برا بھلا کہا پھر میری مستقل مزاجی کی عادی ہوگئی۔۔مجھے جو روز خرچی ملتی ماں کے ہاتھ پر رکھتا۔۔ ہم ساتھ بیٹھ کر کھانا کھاتے۔۔۔اب میں مطمئن تھا۔۔
٭۔۔۔۔۔۔۔٭
آج بستر پر لیٹے میں سوچ رہا تھا۔۔ کب میرا نام رفّو سے رافع بن گيا۔۔۔
مجھے پتا ہی نہ لگا۔۔ میں بریانی والے کے پاس آج بھی کام کرتا ہوں ۔۔میری ماں کو بریانی والے کے مالک مکان نے گھر کی آیا رکھ لیا ہے۔۔اب میں، میرا ضمیر مطمئن ہے۔۔رانا سے آج بھی ملتا ہوں تو تشکر بھرا انداز خود ہی ابھر آتا ہے۔۔۔ میں سوچ بھی نہیں سکتا تھا کہ اس دن گول گپّے کھانا،رانا کا خود دار ہوجانا،میری زندگی کا رخ یوں موڑ دے گا۔۔۔
آج میں غریب ہوں مگر خود دار ہوں کسی کا محتاج نہیں۔۔۔ آج لوگوں کے آگے سے برتن اٹھاتا ہوں ، انکے برتن صاف کرتا ہوں مگر لوگوں کے آگے ہاتھ نہیں پھیلاتا۔۔۔ سب سے بڑھ کر میری نسل کسی بیرے کی اولاد تو ہوگی مگر کسی بھکاری کی اولاد نہیں۔
