مارچ کا مہینہ ہمیں اس دن کی یاد دلاتا ہے جب مسلمانان ہند نے ایک الگ وطن حاصل کرنے کا فیصلہ کیا جہاں وہ اسلام کا نظام قائم کریں اور اپنی زندگیاں اسلامی اصولوں کے مطابق ڈھال سکیں۔
برصغیر میں برطانوی راج کی طرف سے اقتدار عوام کو سونپنے کے عمل کے پہلے مرحلے میں 1936 /1937 کے انتخابات میں کانگریس کو ملک بھر میں واضح اکثریت حاصل ہوئی تو کانگریس نے اقتدار کے نشے میں کچھ ایسے اقدامات کیے جن کی بدولت مسلمانوں میں خدشات اور شکوک و شبہات نے جنم لیا مثلا کانگریس نے ہندی کوقومی زبان قرار دیا گاؤ کشی پر پابندی عائد کر دی اور کانگریس کے ترنگے کو قومی پرچم قرار دے دیا۔
اس سے پہلے بھی کانگریس کے ہندورہنماؤں کے بہت سے فیصلے یہ ظاہر کر رہے تھے کہ کانگریسی اقتدار صرف ہندو اکثریت کے لیے سود مند ہے اور یہ کہ ہندو اور مسلمان دو الگ قومیں ہیں ان کے نظریات اور اقدار اور روایات ایک دوسرے سے یکسر مختلف ہیں جس کی بنا پر یہ دونوں قومیں ایک دوسرے کیساتھ مل کر نہیں رہ سکتیں اس حقیقت کا اظہار مختلف مسلم عمائدین کر چکے تھے1930 میں خطبہ الہ آباد میں ڈاکٹرعلامہ محمد اقبال نے اپنے خیالات کا اظہار کرتے ہوئے کہا تھا کہ ہندو اور مسلمان دو الگ قومیں ہیں اور یہ کہ”میں یہ چاہتا ہوں کہ صوبہ پنجاب، صوبہ شمال مغربی سرحد، سندھ اور بلوچستان کو ایک ریاست کی شکل دی جائے یہ ریاست برطانوی ہند کے اندر اپنی حکومتی خوداختیاری حاصل کرے‘ خواہ اس کے باہر۔ مجھے تو ایسا نظر آتا ہے کہ شمال مغربی ہندوستان کے مسلمانوں کو آخر ایک منظم اسلامی ریاست قائم کرنا ہی پڑے گی”۔
چنانچہ 23 مارچ 1940 کو لاہور میں ہونے والے مسلم لیگ کےاجلاس سےخطاب کرتے ہوئے قائداعظم نےیہ کہا کہ ہندوستان میں مسئلہ فرقہ ورارنہ نوعیت کا نہیں ہے بلکہ بین الاقوامی ہے یعنی یہ دو قوموں کا مسئلہ ہے۔ انہوں نے کہا کہ ہندوؤں اور مسلمانوں میں فرق اتنا بڑا اور واضح ہے کہ ایک مرکزی حکومت کے تحت ان کا اتحاد خطرات سے بھر پور ہو گا۔ انہوں نے کہا کہ اس صورت میں ایک ہی راہ ہے کہ ان کی علاحدہ مملکتیں ہوں۔
اجلاس کے دوسرے دن یعنی 23 مارچ کو بنگال کے وزیر اعلی مولوی فضل الحق نے قرار داد لاہور پیش کی جس میں کہا گیا کہ اس وقت تک کوئی آئینی منصوبہ نا تو قابل عمل ہوگا اور نہ مسلمانوں کو قبول ہوگا جب تک ایک دوسرے سے ملے ہوئے جغرافیائی یونٹوں کی جداگانہ علاقوں میں حد بندی نہ ہو قرارداد میں کہا گیا کہ ان علاقوں میں جہاں مسلمانوں کی عددی اکثریت ہے جیسا کہ ہندوستان کے شمال مغربی اور شمال مشرقی علاقے، انہیں یکجا کر کے ان میں آزاد مملکتیں قائم کی جائیں جن میں شامل یونٹوں کو خود مختاری اور حاکمیت اعلی حاصل ہو۔
اس قرارداد کی تائید مختلف صوبوں سے آنے والے مسلمان رہنماؤں نے کی جن میں یو پی کے مسلم لیگی رہنماخلیق الزمان، پنجاب کےمولانا ظفر علی خان، سندھ کےحاجی عبداللہ ہارون، بلوچستان کےقاضی عیسی، خیبر پختونخوا کے سردار اورنگزیب، عبدالحامد بدایونی، اور بیگم مولانا محمد علی جوہر شامل تھے۔
یہ قرارداد تحریک پاکستان کی راہ میں ایک سنگ میل ثابت ہوئی اس قرارداد نے مسلمانان ہند کیلئے جدوجہد کی راہ متعین کر دی۔ برصغیر کے مسلمانوں نے قائداعظم کی ولولہ انگیز قیادت میں سخت جدوجہد کی آخر کار سات سال کے عرصے میں برصغیر کے مسلمانوں نےپاکستان کی صورت میں ایک الگ مسلم ریاست کی بنیاد رکھی ۔
پاکستان کی بنیاد دو قومی نظریہ پر رکھی گئی یعنی ہندو اور مسلمان دو علیحدہ قومیں ہیں اور کبھی مل کر نہیں رہ سکتے یہ ملک اسلام کے نام پر حاصل کیا گیا. دیکھا جائے تو یہ اس وقت کے لحاظ سے بہترین فیصلہ تھا متحدہ ہندوستان میں ہندو اکثریت کی موجودگی میں مسلمانوں کی ترقی کے امکانات نا ہونے کے برابر تھے بلکہ مسلمانوں کی بقا کے لیے ایک علیحدہ مملکت کا وجود ناگزیر تھا۔
موجودہ حالات کا جائزہ لیا جائے تو بھی ظاہر ہوتا ہے کی ہماری بزرگوں نے کس قدر دور اندیشی کا مظاہرہ کیا پاکستان نہ ہوتا تو آج مسلمان ہندوؤں کے غلام ہوتے اور جو حالات ہندوستانی مسلمانوں کو درپیش ہیں ان کا سامنا کر رہے ہوتے۔ بھارت میں مسلمانوں کی حالت زار سے اندازہ ہوتا ہے کہ پاکستان کتنی بڑی نعمت ہے اور آزادی سے بڑھ کر کوئی چیز نہیں آج بھارت نے کشمیری مسلمانوں پر ظلم و ستم کی انتہا کر دی ہے بھارت نےدوسرے علاقوں میں بھی مسلمانوں پر عرصہ حیات تنگ کر دیا گیا ہے آئے دن انہیں کسی نہ کسی طریقے سے ستایا جاتا ہے۔
کہنے کو بھارت ایک سیکولر ریاست ہے مگر وہاں ہندو اکثریت اقلیتوں کو ان کے حقوق دینے پر تیار نہیں بھارت پر ہندو انتہا پسندوں کی حکومت ہے جو ہندو راج کے علم بردار ہیں اسی بنا پر بھارت کے ہمسایہ ممالک بھی جن میں سری لنکا ،نیپال، بنگلادیش ،چین اور پاکستان شامل ہیں تقریبا سب ہی بھارت کے جارحانہ رویوں کا شکار ہیں۔
پاکستان کے ساتھ بھارت کی دشمنی کا اندازہ اس بات سے لگایا جاسکتا ہے کہ قیام پاکستان سے لیکر اب تک بھارت پاکستان کے خلاف مختلف سازشوں میں ملوث رہا ہے اور پاکستان کو نقصان پہنچانے میں پیش پیش ہے 1971میں مشرقی پاکستان کو علیحدہ کرنے میں بھارت نے اہم کردار ادا کیا مسئلہ کشمیر بھارت کی ہٹ دھرمی کی وجہ سے آج تک حل نہ ہو سکا سچ یہ ہے کہ بھارت نے ابھی تک پاکستان کے وجود کو تسلیم ہی نہیں کیا اور مسلسل پاکستان کو نقصان پہنچانے میں مصروف ہے 23 مارچ کا دن ہم سے مطالبہ کرتا ہے کی اگر ہم پاکستان کومستحکم اور خوشحال دیکھنا چاہتے ہیں تو ہمیں پاکستان کی نظریاتی سرحدوں کی حفاظت کرنا ہوگی اور ان مقاصد کو پورا کرنا ہوگا جن کی خاطر ہزاروں مسلمانوں نے اپنی جان مال اور عزت کی قربانی دی تاکہ دشمنوں کی سازشوں کو ناکام بنا سکیں۔
