اگر ہم تاریخ پر نظر ڈالیں تو ہمیں بے شمار ایسی مثالیں ملتی ہیں جہاں خواتین نے ہر میدان میں اپنی صلاحیتوں کا لوہا منوایا۔ سیاست سے لے کر تعلیم، معیشت سے لے کر سائنس اور ٹیکنالوجی تک، خواتین نے نہ صرف خود کو ثابت کیا بلکہ معاشرتی ترقی میں کلیدی کردار بھی ادا کیا ہے۔ قدیم تہذیبوں سے لے کر جدید دور تک، خواتین ہمیشہ جدوجہد کی علامت رہی ہیں۔
1893 میں نیوزی لینڈ نے خواتین کو ووٹ کا حق دے کر برابری کے سفر کا آغاز کیا، جب کہ 1911 میں پہلا عالمی یومِ خواتین منایا گیا۔ اسی طرح، 1995 میں بیجنگ میں ہونے والی عالمی کانفرنس میں خواتین کے حقوق اور مساوات کے حوالے سے ایک تاریخی اعلامیہ پیش کیا گیا، جس نے خواتین کی ترقی کے لیے راہیں ہموار کیں۔
پاکستان میں بھی خواتین نے ہر میدان میں اپنی صلاحیتوں کا مظاہرہ کیا ہے۔ محترمہ فاطمہ جناح، بینظیر بھٹو، ، نسیم حمید اور بے شمار دیگر خواتین نے اپنی محنت، لگن اور ہمت سے یہ ثابت کیا کہ اگر مواقع فراہم کیے جائیں تو خواتین کسی سے کم نہیں۔
لیکن بدقسمتی سے، آج بھی پاکستان سمیت دنیا بھر میں خواتین کو کئی چیلنجز کا سامنا ہے۔ تعلیم کی کمی، گھریلو تشدد، صنفی امتیاز، اور ملازمتوں میں مساوی مواقع کا فقدان ایسے مسائل ہیں جو خواتین کی ترقی میں رکاوٹ بنے ہوئے ہیں۔
کسی بھی معاشرے کی ترقی میں خواتین کی تعلیم اور خودمختاری بنیادی حیثیت رکھتی ہے۔ ایک پڑھی لکھی عورت نہ صرف اپنی زندگی سنوار سکتی ہے بلکہ اپنی نسلوں کے مستقبل کو بھی روشن کر سکتی ہے۔ اس لیے ضروری ہے کہ حکومت اور سماجی ادارے خواتین کی تعلیم اور روزگار کے مواقع کو یقینی بنائیں، تاکہ وہ اپنے فیصلے خود کر سکیں اور ایک بااختیار زندگی گزار سکیں۔
خواتین کو مساوی حقوق دینا محض ایک نعرہ نہیں، بلکہ ایک سماجی، اخلاقی اور انسانی ذمہ داری ہے۔ ہمیں ایک ایسا معاشرہ تشکیل دینا ہوگا جہاں خواتین کو عزت، تحفظ اور ترقی کے یکساں مواقع میسر ہوں۔
ہمیں عہد کرنا ہوگا کہ ہم صنفی برابری، خواتین کی خودمختاری، اور ان کے حقوق کے تحفظ کے لیے اپنی کوششیں جاری رکھیں گے۔ کیونکہ جب خواتین مضبوط ہوں گی، تو معاشرہ بھی ترقی کرے گا، اور ایک خوشحال پاکستان کی تعبیر ممکن ہو سکے گی۔
