بلاگ ہیڈ لائن

پاکستان میں عورت کی سیاست بے آواز

370

ہم ایک ایسے پڑھے لکھے معاشرے میں رہتے ہیں، جہاں عورت کی کوکھ سے پیدا ہونے کے باوجود ہم اسی عورت کو خود سے کم تر اور حقیر سمجھتے ہیں ۔گھر میں ماں ،بہن موجود ہونے کے باوجود آج کا پڑھا لکھا نوجوان طبقہ باہر بات بات پر ماں اور بہن کی گالی دینے کو فخر سمجھتا ہے۔ ہمارے معاشرے میں بات خواتین پر گالیوں پر آکر ختم نہیں ہوتی بلکہ اسکا آغاز ماڈرن انداز اختیار کرتے ہوئے اب نعروں میں تبدیل ہو گیاہے۔

ایسے ذہنی بیمار معاشرے میں کسی بھی عورت کا سیاست میں آنا اسکے لئے گالی،گندے نعرے اور کردار کشی ہوتا ہے۔کیا پاکستان میں عورت کی سیاست کامیاب ہو سکے گی؟

پاکستانی خاتون سیاستدانوں کے ناموں کی فہرست کا اگر آغاز کیا جائے تو بلاشبہ اس میں پہلا نام مادر ملت فاطمہ جناح کا آتا ہے مگر آج مختصر روشنی ہم محترمہ فاطمہ جناح،نصرت بھٹو،کلثوم نواز اور بے نظیر بھٹو کی سیاست پر ڈالیںگے ۔

تحریک پاکستان میں مادر ملت فاطمہ جناح کی خدمات ناقابل فراموش ہیں۔ انہوں نے جدوجہد آزادی میں حصہ لینے کے لئے برصغیر کی مسلم خواتین کو بیدار کیا اور انہیں منظم کرکے ان سے ہراول دستے کاکام لیا۔ آپ ہی کی بدولت برصغیر کے گلی کوچوں میں مردوں کے ساتھ ساتھ خواتین بھی تحریک میں سرگرم ہوئیں۔ اسی پر اکتفاء نہیں بلکہ آپ نے بانی پاکستان قائد اعظم محمد علی جناح کی خدمت کی صورت، تحریک پاکستان میں عملی طور پر حصہ لے کر عظیم خدمات سر انجام دیں۔آپ نے دن رات قائداعظم کے آرام و سکون کا خیال رکھا،وہ سیاسی بصیرت میں اپنے بھائی قائداعظم کی حقیقی جانشین تھیں، اپنی قربانیوں کی وجہ سے وہ قوم کی ماں کا لقب ’’مادر ملت‘‘ حاصل کر کے سرخرو ہوئیں۔

پاکستان کی دوسری خاتون سیاستدان نصرت بھٹو جو کہ ذوالفقار علی بھٹو کی اہلیہ تھیں۔انہوں نے اپنے شوہر کے قید کے دنوں میں پارٹی کی قیادت سنبھالی اور ان کی رہائی کے لیے بھرپور سیاسی تحریک چلائی۔ وہ 1979ء سے 1984ء تک پارٹی کی چیئرپرسن رہیں جب کہ بعد کے دنوں میں وزیرِ اعظم بننے والی اپنی بیٹی بے نظیر بھٹو کی کابینہ میں وہ سینئر وزیر بھی رہیں۔ ان کا عہدہ نائب وزیرِ اعظم کے مساوی تھا۔

پاکستان کی تیسری خاتون سیاستدان تین بار خاتونِ اول رہنے والی بیگم کلثوم نواز کے بارے میں تجزیہ نگاروں کا خیال ہے کہ ماضی کی طرح بیگم کلثوم نواز ایک مرتبہ پھر سیاست میں جدوجہد کے لیے تیار تھیں لیکن بیماری نے انہیں مہلت نہ دی۔ نواز شریف کی سیاست میں انہوں نے ریڑھ کی ہڈی کا کردار ادا کیا اور نواز شریف کی حکومت کا تختہ الٹنے کے بعد احتجاجی سیاست کی۔

اب بات کرتے ہیں پاکستان کی چوتھی خاتون سیاستدان بے نظیر بھٹو کی ۔بے نظیر بھٹو پاکستان کی پہلی خاتون وزیر اعظم تھیں۔ پہلی بار آپ 1988ء میں پاکستان کی وزیر اعظم بنیں لیکن صرف 20 مہینوں کے بعد اس وقت کے صدر پاکستان غلام اسحاق خان نے بدعنوانی کا الزام لگا کر اپنے خصوصی اختیارات سے اسمبلی کو برخاست کیا اور نئے الیکشن کروائے۔بے نظیر بھٹو کا تعلق پیپلز پارٹی سے تھا۔ ذوالفقار علی بھٹو کی بڑی صاحبزادی اور سابق وزیر اعظم بے نظیربھٹو 21جون 1953ء میں سندھ کے مشہور سیاسی بھٹو خاندان میں پیدا ہوئیں۔ بے نظیر نے اپنے بھائی مرتضٰی بھٹو کے قتل اور اپنی حکومت کے ختم ہونے کے کچھ عرصہ بعد ہی جلا وطنی اختیار کرتے ہوئے متحدہ عرب امارات میں دبئی میں قیام کیا۔ اسی دوران بے نظیر، نواز شریف اور دیگر پارٹیوں کے سربراہان کے ساتھ مل کر لندن میں اے آر ڈی کی بنیاد ڈالی اور ملک میں جنرل پرویز مشرف کی حکومت کے خلاف بھرپور مزاحمت کا اعلان کیا۔ ان کی جلاوطنی کے دوران ایک اہم پیش رفت اس وقت ہوئی۔ جب 14 مئی 2006ء میں لندن میں نواز شریف اور بے نظیر کے درمیان میثاقِ جمہوریت پر دستخط کر کے جمہوریت کو بحال کرنے اور ایک دوسرے کے خلاف استعمال نہ ہونے کا فیصلہ کیا۔

دوسری پیش قدمی اس وقت ہوئی جب 28 جولائی 2007ء کو ابوظہبی میں جنرل مشرف اور بے نظیر کے درمیان ایک اہم ملاقات ہوئی جس کے بعد پیپلز پارٹی کی چیئرپرسن تقریباً ساڑھے آٹھ سال کی جلاوطنی ختم کر کے 18 اکتوبر کو وطن واپس آئیں تو ان کا کراچی ائیرپورٹ پر کارکنان کی جانب سے استقبال کیا گیا۔ بے نظیر کا کارواں شارع فیصل پر مزارِ قائد کی جانب بڑھ رہا تھا کہ اچانک زور دار دھماکہ ہوا جس سے انسانی زندگیوں کا نقصان اور کئی لوگ زخمی ہوئے۔ بے نظیر کو بحفاظت بلاول ہاؤس پہنچا دیا گیا۔

پیپلز پارٹی کی چیئرپرسن جب اپنے بچوں بلاول، بختاور اور آصفہ سے ملنے دوبارہ دبئی گئیں تو ملک میں جنرل مشرف نے 3 نومبر کو ایمرجنسی نافذ کر دی۔ یہ خبر سنتے ہی بے نظیر دبئی سے واپس وطن لوٹ آئیں۔ ایمرجنسی کے خاتمے، ٹی وی چینلز سے پابندی ہٹانے اور سپریم کورٹ کے ججز کی بحالی کا مطالبہ کرتے ہوئے حکومت کے خلاف تحریک چلانے کا اعلان کیا۔ اس وقت تک ملک میں نگران حکومت بن چکی تھی اور مختلف پارٹیاں انتخابات میں حصہ لینے کے معاملے میں بٹی ہوئی نظر آ رہی تھیں۔ اس صورت میں پیپلز پارٹی نے میدان خالی نہ چھوڑنے کی حکمت عملی کے تحت تمام حلقوں میں امیدوار کھڑے کیے اور کاغذاتِ نامزدگی جمع کرائے ۔

مختلف تجزیوں اور بیانات کے مطابق 27 دسمبر 2007ء کو جب بے نظیر لیاقت باغ میں عوامی جلسے سے خطاب کرنے کے بعد اپنی گاڑی میں بیٹھ کر اسلام آباد جا رہی تھیں تو لیاقت باغ کے مرکزی دروازے پر پیپلز یوتھ آرگنائزیشن کے کارکنان بے نظیر بھٹو کے حق میں نعرے بازی کر رہے تھے۔ اس دوران جب وہ پارٹی کارکنان کے ساتھ اظہار یکجہتی کے لیے گاڑی کی چھت سے باہر نکل رہی تھیں کہ نامعلوم شخص نے ان پر فائرنگ کر دی۔ اس کے بعد بے نظیر کی گاڑی سے کچھ فاصلے پر ایک زوردار دھماکا ہوا جس میں ایک خودکش حملہ آور جس نے دھماکہ خیز مواد سے بھری ہوئی بیلٹ پہن رکھی تھی، خود کو دھماکے سے اڑا دیا۔ اس دھماکے میں بینظیر بھٹو جس گاڑی میں سوار تھیں، اس کو بھی شدید نقصان پہنچا لیکن گاڑی کا ڈرائیور اسی حالت میں گاڑی کو بھگا کر راولپنڈی جنرل اسپتال لے گیا جہاں وہ زخموں کی تاب نہ لاتے ہوئے دنیا سے رخصت ہو گئیں۔

پیپلزپارٹی نے حکومت بنانے کے بعد بے نظیر کے قتل کی تحقیقات اپنے پرانے مطالبے کے مطابق اقوام متحدہ سے کروانے کے لیے درخواست دی جو اس نے قبول کر لی۔ آصف علی زرداری نے بے نظیر بھٹو کی پہلی برسی پر دعویٰ کیا کہ انھیں معلوم ہے کہ قاتل کون ہیں۔ البتہ صدر مملکت بن جانے کے بعد دوسری برسی پر اپنی تقریر میں اس بارے میں کچھ نہ بتا سکے اور یہ سچ آج تک سامنے نا آسکا کہ بے نظیر بھٹو کو قتل کس نے کیا اس بارے میں مبصرین کی مختلف رائے ہے۔

ان چار سیاستدانوں کے علاوہ بھی خواتین سیاستدان ہیں جس میں غنوی بھٹو،مریم نواز اور آصفہ بھٹو شامل ہیں۔غنوی بھٹو جو کہ بے نظیر بھٹو کے بھائی کی بیوہ ہیں وہ پیپلز پارٹی کے دو گروپس کے غیر معروف گروپ سے تعلق رکھتی ہیں جبکہ انکی صاحبزادی فاطمہ بھٹو اپنے والد کیلئے ایک کتاب بھی لکھ چکی ہیں۔جبکہ بے نظیر کی صاحبزادیوں آصفہ بھٹو اور بختاور بھٹو میں فی الحال آصفہ بھٹو زیادہ سرگرم دکھائی دیتی ہیں۔

ملک سیاستدانوں میں مریم صفدر جو اپنے اصل نام مریم نواز شریف سے جانی جاتی ہیں۔ ایک پاکستانی سیاست دان ہیں اور نواز شریف اور کلثوم نواز شریف کی بیٹی ہیں۔سیاسی طور پر وہ بھی اپنے والد نواز شریف کا سیاسی کیریئر بچانے میں ہمیشہ انکے شانہ بشانہ دکھائی دیتی ہیں۔آج پاکستان میں خواتین کی سیاست پر بات کرنے کا مقصد صرف یہ ہے کہ فاطمہ جناح کے علاوہ یہ تمام خواتین بھٹو اور شریف خاندان سے تعلق رکھتی ہیں جسکو موروثی سیاست کہا جاتا ہے جبکہ دیگر سیاسی جماعتوں میں شامل خواتین کو سیاست میں آنے کا موقع تو ملا مگر سیاستدان بن کر ابھرنے کا نہیں ۔

جس ملک میں سیاست میں آکر کسی خاندانی اور پڑھی لکھی لڑکی کو گالیاں ،گندے نعرے اور کردار کشی سہنی پڑے کیا اس ملک میں ہم کسی بہادر خاتون سیاستدان کا خواب دیکھ سکتے ہیں؟ یا پھر کبھی فاطمہ جناح یا بے نظیر کی طرح ذہنی یا گولی کی دہشت گردی سے عورت کی آواز بند کر دی جائے گی۔اللہ نے عورت کو بہت مضبوط بنایا ہے اسلئے مجھے امید ہے کہ گالیاں کھا کر ،گندے نعرے سن کر اور کردار کشی کے الزامات سہہ کر بھی پاکستان میں آج نہیں تو کل عورت کی سیاست بھی بے آواز نہیں رہے گی۔