لندن(جسارت نیوز):2021ورلڈ اسنوکر چمپئن شپ کی سیمی فائنل لائن اپ مکمل ہو گئی ہے۔ کوارٹر فائنل مرحلے میں اسٹورٹ بنگھم نے انتھونی میک گل، مارک سیلبی نے مارک ولیمز، کیرن ولسن نے نیل رابرٹسن اور شان مورفی نے جوڈ ٹرمپ کو شکست دے کر فائنل فور میں جگہ بنا لی ہے۔ ورلڈ سنوکر چیمپئن شپ کے دلچسپ مقابلوں کا سلسلہ کروسبیل تھیٹر، شیفیلڈ میں جاری ہے۔ کوارٹر فائنل مرحلے کے پہلے میچ میں انگلینڈ کے سٹورٹ بنگھم نے سکاٹ لینڈ کے انتھونی میک گل کو کانٹے دار مقابلے کے بعد 12-13 سے ہرا کر سیمی فائنل میں جگہ بنائی۔ دوسرے کوارٹر فائنل میں عالمی نمبر چار انگلینڈ کے مارک سیلبی نے ویلز کے مارک ولیمز کے خلاف بآسانی 3-13 سے کامیابی حاصل کرکے سیمی فائنل کیلئے کوالیفائی کیا۔ تیسرے کوارٹر فائنل میں عالمی نمبر چھ انگلینڈ کے کیرن ولسن نے عالمی نمبر تین آسٹریلیا کے نیل رابرٹسن کو دلچسپ مقابلے کے بعد 8-13 سے ہرایا اور سیمی فائنل میں جگہ بنائی۔ چوتھے اور آخری کوارٹر فائنل میں عالمی نمبر سات انگلینڈ کے شان مورفی نے عالمی نمبر دو جوڈ ٹرمپ کو سخت مقابلے کے بعد 11-13 سے شکست دے کر سیمی فائنل کیلئے کوالیفائی کیا۔
