لاڑکانہ (نمائندہ جسارت) لاڑکانہ شہر کے ریلوے اسٹیشن کے قریب لوکو شیڈ کے علاقے میں جھگیوں میں آگ بھڑک اٹھی، آگ سلیم چانڈیو، بابر، راشد، علی نواز، واجد و دیگر کی جھگیوں میں لگی جبکہ اطلاع کے باوجود فائر بریگیڈ عملہ دیر سے پہنچا، جس کے باعث گھروں میں موجود جہیز کا سامان، سونے زیورات، نقدی اور دیگر قیمتی سامان جل کر خاکستر ہوگیا، اس موقع پر علی نواز چانڈیو و دیگر کا کہنا تھا کہ نہ جانے کس ظالم نے جھگیوں کو آگ لگائی ہمارا سب کچھ لٹ گیا، بڑی مشکلوں سے برسوں سے کچی جھگیاں بنا کر رہ رہے ہیں، گدھا گاڑی چلا کر مزدوری کر کے پیٹ پالتے ہیں۔ انہوں نے مطالبہ کیا کہ معاملے کی تحقیقات کرکے انصاف فراہم کیا جائے بصورت دیگر عدلیہ سے رابطہ کیا جائے گا۔
