کراچی( اے پی پی )کراچی ووکیشنل ٹریننگ سینٹر (کے وی ٹی سی) کی جانب سے اسپیشل بچوں کے لئے انٹر اسکول بیڈمنٹن ٹورنامنٹ کا انعقاد کیا گیا۔بروکس فارمہ کے ڈائریکٹر ندیم خان مہمانِ خصوصی تھے۔ انہوں نے مقابلے میں حصہ لینے والے بچوں میں میڈلز تقسیم کیے اور بچوں کا حوصلہ بڑھایا۔ انہوں نے کے وی ٹی سی کی انتظامیہ اور اسپورٹس کوچز کو ٹورنامنٹ کے کامیاب انعقاد پر مبارکباد دی۔کراچی ووکیشنل ٹریننگ سینٹر میں منعقد ہونے والے بیڈمنٹن مقابلوں میں کے وی ٹی سی کے طلبا کا پلڑا بھاری رہا جنہوں نے اپنی قابلیت کا شاندار مظاہرہ کرتے ہوئے مختلف مقابلوں میں بارہ سونے اور پانچ چاندی کے تمغے حاصل کیے۔ٹورنامنٹ میں حصہ لینے والی زینب ریہیبلیٹیشن سینٹر، سینوسہ ڈے ہوم، دی ایفرٹ، ایس آر آیس سی اور دیوا اکیڈمی کے بچوں نے بھی بہترین کھیل پیش کیا اور سونے اور چاندی کے تمغے حاصل کیے۔ اس موقع پر سی ای او کے وی ٹی سی سینیٹر عبدالحسیب خان بھی بچوں کی حوصلہ افزائی کے لیے موجود تھے۔
