اسلام آباد (آن لائن) اسپیکر قومی اسمبلی اسد قیصر سے چیئرمین سینیٹ صادق سنجرانی نے ملاقات کی، ملاقات میں ملکی سیاسی اور پارلیمانی امور سمیت دیگر اہم امور پر تبادلہ خیال کیا گیا ،چیئرمین سینیٹ نے اسپیکر قومی اسمبلی کا پارلیمانی نظام کو مزید مضبوط بنانے کے لیے کوششوں کی تعریف کی ۔ملاقات میں قائد ایوان سینیٹ ڈاکٹر شہزاد وسیم بھی موجود تھے اس موقع پر اسپیکرقومی اسمبلی اسد قیصر نے کہا کہ ملک کو درپیش چیلنجز سے نمٹنے کے لیے حزب اقتدار اور حزب اختلاف کو سرگرم
کردار ادا کرنا ہو گا،ایوان میں خوشگوار ماحول میں بحث اور قانون سازی پارلیمان کے تکریم میں اضافہ کرے گی، موجودہ انتخابی عمل میں شفافیت وقت کی اہم ضرورت ہے،اپوزیشن کو پارلیمانی کمیٹی کے قیام کے لیے خطوط لکھ دیے ہیں جواب کا انتظار ہے۔ انہوں نے کہا کہ مستقبل کے لیے انتخابی عمل پر اعتماد کو بحال کرنا اپوزیشن اور حکومت کی مشترکہ ذمے داری ہے،، سینیٹمیں قائد حزب اختلاف سے ہونے والا رابطہ خوش آئند تھا، پیپلز پارٹی کا قومی اسمبلی میں ماحول کو سازگار بنانے اور اپنے تعاون کا یقین دلانا قابل ستائش ہے۔
