پی ڈی ایم کا ’’انقلاب‘‘ گلے کی ہڈی بن گیا، ہمایوں اختر

لاہور (آن لائن)پاکستان تحریک انصاف کے سینئر مرکزی رہنما و سابق وفاقی وزیر ہمایوں اخترخان نے کہا ہے کہ پی ڈی ایم کا ذاتی مفادات پر مبنی ’’انقلاب ‘‘ان کے اپنے گلے کی ہڈی بن گیا ہے ،حکومت اپوزیشن کے ساتھ معیشت ، خارجہ پالیسی اور انتخابی اصلاحات پر بات کرنے کے لیے تیار ہے لیکن مذاکرات کی میز پر آنے کے لیے ریلیف دینے کی شرط قبول نہیں کی جائے گی ۔اپنے بیان میں انہوں نے کہا کہ گیارہ جماعتوں نے اتحاد بنا کر جلسوں کی صورت
میں جو ’’انقلاب ‘‘ بر پا کیا تھا اس کاآج کہیںنام و نشان بھی نہیں بلکہ نہ صرف نام نہاد انقلاب بلکہ اپوزیشن نے اپنی آنکھوں میں جو خواب سجائے تھے ان پر بھی اوس پڑ چکی ہے ۔ اپوزیشن کی سیاست بند گلی میں داخل ہوچکی ہے اور یہ اب ایسی جگہ پر ہیں جہاں آگے دیوار اور پیچھے گڑھا ہے ۔ انہوںنے کہا کہ حکومت کا واضح موقف ہے کہ ملک و قوم کے بہترین مفاد میں اپوزیشن سے بات چیت کرنے کے لیے تیار ہیں لیکن یہ غیر مشروط ہو گی اور کسی کرپشن کرنے والے کو کوئی ریلیف نہیں ملے گا۔