لاڑکانہ ، باراتیوں سے بھری بس کو حادثہ، 10 افراد جاں بحق

لاڑکانہ(نمائندہ جسارت)لاڑکانہ میں مسافر بس کے حادثے میں 10
افراد جاں بحق اور 30 زخمی ہوگئے۔پولیس کے مطابق حادثہ لاڑکانہ میں بھینس کالونی کے قریب پیش آیا جہاں ایک مسافر بس الٹنے سے 10 افراد جاں بحق ہوگئے۔پولیس کے مطابق جاں بحق افراد میں 3 خواتین، 2 بچے اور 5 مرد شامل ہیں، لاشیں اسپتال منتقل کردی گئی ہیں جب کہ اسپتال ذرائع کا کہنا ہے کہ بس حادثے کے 30زخمیوں کو بھی اسپتال لایا گیا ہے۔پولیس کا کہنا ہے کہ بھینس کالونی کے قریب ٹریکٹر کو بچاتے ہوئے بس الٹ گئی، حادثے کے بعد بس کو کاٹ کر زخمی اورجاں بحق افراد کا نکالا گیا۔لاڑکانہ پولیس کے مطابق شہر کے مرادواہن محلے کی رہائشی کنبھر برادری کی باراتیوں سے بھری بس قمبر شہداد کوٹ کے علاقے لالو رونک جا رہی تھی کہ رشید وگن تھانہ کی حدود میں لاڑکانہ بائے پاس پر ٹریکٹر ٹرالی سے ٹکرا گئی۔زخمیوں میں 18 افراد کی حالت تشویشناک بتائی جاتی ہے۔