لاڑکانہ (نمائندہ جسارت) چانڈکا میڈیکل کالج اسپتال میں ادویات کا معائنہ نہ کیے جانے پر میڈیکل سپرنٹنڈنٹ کا ڈپٹی کمشنر لاڑکانہ کو مراسلہ، جلد ادویات کا معائنہ کروایا جائے بصورت دیگر اسپتال کے مختلف شعبوں میں ادویات کی قلت کا سامنا کرنا پڑسکتا ہے، جس کے باعث میڈیکل سپرنٹنڈنٹ نے ڈپٹی کمشنر سے مطالبہ کیا ہے کہ وہ اسسٹنٹ کمشنر لاڑکانہ کو ادویات کے معائنہ کے لیے بھجوائیں جس کے بعد ادویات کو اسپتال کے شعبہ جات میں بھیجا جاسکے، اس سے پہلے کہ اسپتال میں ادویات کی کمی کا سامنا کرنا پڑے۔ دوسری جانب اسسٹنٹ کمشنر کا کہنا ہے کہ ڈپٹی کمشنر کسی کو بھی ادویات معائنہ کے احکامات دے سکتے ہیں لیکن انہوں نے سابقہ بورڈ کے تحت اس اقدام سے انکار کردیا ہے، اسپتال مینجمنٹ بورڈ بننے کے بعد سربراہ جامعہ بے نظیر بھٹو کی وائس چانسلر ڈاکٹر انیلہ عطاء الرحمن ہیں اور ایم ایس اسی بورڈ کے ذریعے معائنہ کروا سکتے ہیں، ایم ایس نا جانے کیوں رولز اور ریگیولیشنز کو بائی پاس کررہے ہیں اور ختم شدہ سابقہ بورڈ کے ذریعے معائنہ کے خواہاں ہیں۔ دوسری جانب ایم ایس چانڈکا میڈیکل کالج اسپتال ڈاکٹر ارشاد کاظمی کا کہنا ہے کہ دوائوں کی معائنہ کمیٹی سیکرٹری صحت کی طرف سے نوٹیفائیڈ ہے، اسپتال مینجمنٹ بورڈ کا استعمال سے کوئی تعلق نہیں ہے۔ صورتحال کچھ بھی ہو اس سارے معاملے میں نقصان اسپتال میں آنے والے مریضوں کا ہوگا۔
