لاہور (نمائندہ جسارت) عالمی ادارۂ صحت کی جانب سے پنجاب حکومت کے لیے 8ایمبولینس گاڑیوں اور15موٹر سائیکلوں کا عطیہ دیا گیا۔ وزیراعلیٰ آفس میں ایمبولینس گاڑیاں اور موٹر سائیکلیں پنجاب حکومت کے سپرد کرنے کی تقریب منعقد ہوئی، جس کے مہمان خصوصی عثمان بزدار تھے، جنہیں ڈبلیو ایچ او کے کنٹری ہیڈ ڈاکٹر الپتھاماہی پالانے ایمبولینس گاڑیوں کی چابیاں پیش کیں۔ وزیراعلیٰ عثمان بزدار نے ایمبولینس گاڑیوں اور موٹرسائیکلوں کامعائنہ کرتے ہوئے کہا کہ یہ تمام گاڑیاں کورونا کے مریضوں کو منتقل کرنے، معمر شہریوں کو کورونا ویکسین لگانے کے لیے استعمال کی جاسکیں گی۔ علاوہ ازیں موٹر سائیکل کے ذریعے کورونا ٹیسٹ کے نمونے لیبارٹری پہنچائیں جاسکیں گے۔ ایمبولینس میں آکسیجن، دیگر آلات اورٹیسٹ سیمپل لے جانے کے لیے آئس باکس بھی موجود ہوں گے۔ لاہور ایئر پورٹ پر کورونا مریضوں کو اسپتال منتقل کرنے کے لیے ایمبولینس ہمہ وقت موجود ہوگی جب کہ واہگہ بارڈر پر بھی سرحد پار آنے والے مریضوں کو ایمبولینس کے ذریعے منتقل کیا جاسکے گا۔ وزیراعلیٰ عثمان بزدار نے ایمبولینس گاڑیاں اور موٹرسائیکلیں عطیہ کرنے پر ورلڈ ہیلتھ آرگنائزیشن کے تعاون کا شکریہ ادا یا۔
