لاڑکانہ (نمائندہ جسارت) ایس ایس پی لاڑکانہ مسعود احمد بنگش کی ہدایات پر لاڑکانہ پولیس نے جرائم پیشہ افراد کیخلاف کارروائیاں کرتے ہوئے اشتہاری، روپوش و مطلوب 16 ملزمان کو گرفتار کرکے منشیات، چوری شدہ بھینس، موبائل فونز اور نقدی برآمد کرلی۔ نوڈیرو پولیس نے پیر متارو پل سے علی گل جیہو قتل مقدمے کے مرکزی ملزم حسین جیہو کو، یونیورسٹی پولیس نے شیخ لاڑو سے مطلوب ملزم ذیشان کلہوڑو کو، ایئر پورٹ پولیس نے مطلوب ملزم صاحب بگھیو کو، تعلقہ پولیس نے قمبر روڈ سے منشیات فروش سہیل عرف راجہ سولنگی کو بھنگ سمیت، تعلقہ پولیس نے جوئے کے اڈے پر چھاپا مارکر تین جواریوں قربان، نذر محمد اور حسن کو نقدی سمیت، دڑی پولیس نے جوئے کے اڈے پر چھاپا 9 جواریوں ذوالفقار، ایاز ممتاز، شیر محمد، باز محمد غلام رسول، معشوق، علی گل غلام رسول کو نقدی سمیت گرفتار کرلیا۔ دوسری جانب ڈوکری پولیس نے بھینس چوری کی اطلاع پر ناکابندی کرکے محرابپور روڈ سے عابد میتلو کی بھینس برآمد کرکے اصل مالک کے حوالے کردی جبکہ رتو ڈیرو پولیس نے دو چوری شدہ موبائل فونز برآمد کرکے اصل مالکان سنیل کمار اور افضل اوڈہو کے حوالے کردی ہیں۔ پولیس کے مطابق گرفتار ملزمان کیخلاف ایسے مقدمات درج کرکے تفتیش شروع کردی گئی ہے۔
