بونیر (آئی این پی) بونیر مردان ہائی وے پر باغ جبران ہوٹل کے قریب ٹریفک حادثے میں موٹر کار میں سوار چھے افراد ماربل کے بھرے ٹرک تلے دب گئے، ماربل سے بھرا ٹرک مردان کی طرف جبکہ موٹر کار میں سوار خاندان بونیر آرہا تھا، افسوس ناک حادثے میں ایک ہی خاندان کے 4 افراد جاں بحق جبکہ دو زخمی ہوئے، جاں بحق ہونے والوں میں ارشد اقبال ساکن مانجار مندنڑ اس کی بیوی، 6 سالہ بیٹا اور 4 سالہ بیٹی شامل ہے۔ المناک حادثے میں جاں بحق مانجار مندنڑ بونیر کے ایک ہی خاندان کے چار افراد کی نماز جنازہ جمعہ کے روز 11بجے ابراہیم بابا میں ادا کی گئی۔ جاں بحق ہونے والوں میں ارشد اقبال، ان کی بیوی، چھے سالہ بیٹا اور چار سالہ بیٹی کی نماز جنازہ ابراہیم بابا میں ادا کی گئی۔ اس موقع پر ہر آنکھ پر نم اور دل افسردہ تھا۔ ایک ہی گھر سے چار جنازے اٹھنے پر عوام میں غصہ پایا گیا۔ جنازے کے موقع پر بدقسمت گاڑی کے ڈرائیور یوسف خان نے کہا کہ ہم مردان سے آرہے تھے اور جب باغ جبران پہنچ گئے تو ماربل اسکریپ سے بھرا ٹرک ڈرائیور سے بے قابو ہوگیا میں نے گاڑی بچانے کی بھرپور کوشش کی۔ یاد رہے کہ بونیر ماربل کانوں سے روزانہ کی بنیاد پر سیکڑوں کی تعداد میں لوڈ ٹرک ملک کے دیگر حصوں کو جاتے ہیں، جو اکثر اس طرح کے حادثات کا شکار ہوتے ہیں، بونیر کے عوام نے حکومت اور ضلعی انتظامیہ بونیر سے مطالبہ کیا کہ حادثات پر قابو پایا جائے۔
