لاڑکانہ(نمائندہ جسارت) لاڑکانہ شہر کے کنگا تھانہ کی حدود گورنمنٹ کامرس کالج روڈ کھوسہ ولیج کے قریب تیز رفتار ٹریکٹر کی ٹکر میں موٹر سائیکل پر سوار گاجی کھاوڑ کے گاؤں راحمون کی رہائشی تین روز قبل نو بیاہتی دلہن چھٹل خاتون موقع پر تڑپ تڑپ پر دم توڑگئیں جبکہ حادثے میں متوفی دلہن کے شوہر ریاض کھوسو بھی شدید زخمی ہوئے تاہم حادثے کے بعد ڈرائیور ٹریکٹر چھوڑ کر فرار ہوگیا۔ اطلاع پر حد کے تھانہ کی پولیس نے پہنچ کر ٹریکٹر تحویل میں لیتے ہوئے نعش اور زخمی کو چانڈکا اسپتال کے شعبہ حادثات منتقل کیا جہاں پوسٹ مارٹم کے بعد نعش ورثا کے حوالے کردی گئی جبکہ زخمی کو طبی امداد دی گئی۔اس موقع پر نوبیاہتی دلہن کے زخمی شوہر ریاض کھوسو نے بتایا کہ میں اپنی بیوی کے ہمراہ علاج کے لیے لاڑکانہ اسپتال موٹرسائیکل پر آرہے تھے کہ کھوسہ ولیج کے قریب تیز رفتار ٹریکٹر کی ٹکر سے بیوی چھٹل خاتون موقع پر جاں بحق ہوئیں اور میں زخمی ہوا۔انہوں نے مطالبہ کیا کہ ٹریکٹر ڈرائیور کو گرفتار کرکے مقدمہ درج کیا جائے۔ دوسری جانب جاں بحق خاتون کی نعش ورثا گاؤں لے گئے جہاں لاش گھر پہنچنے پر کہرام مچ گیا تاہم آخری اطلاع موصول ہونے تک مقدمہ درج نہ ہوسکا اور نہ کوئی گرفتاری عمل میں آسکی۔
