کراچی(اسٹاف رپورٹر)پیپلزپارٹی کے سربراہ سابق صدر آصف علی زرداری نے کہاہے کہ حکومت کو گھر بھیجنا اس وقت بہت ضروری ہو چکا ہے ،اناڑی حکمرانوں کی نااہلی سے ملک کسی بڑے حادثے کا شکار ہو سکتا ہے، پی ڈی ایم متحد ہے، حکومت پر ہر طرف سے وار کرے گی۔ پیپلز پارٹی پنجاب کے جنرل سیکرٹری چودھری منظور احمد سے ٹیلی فون پرگفتگو کرتے ہوئے آصف زرداری کا کہنا تھا کہ ملک شدید خطرات میں ہے، حکمران کوئی بڑا بلنڈر کر سکتے ہیں، حکومت کو گھر بھیجنا اس وقت بہت ضروری ہو چکا ہے،اس لیے کہ اناڑی حکمرانوں کی نااہلی سے ملک کسی بڑے حادثے کا شکار ہو سکتا ہے، حکمرانوں کو اب مزید کورونا کے پیچھے چھپنے نہیں دیں گے ، نہ یہ ویکسین خرید سکے نہ ہی بے نظیر انکم سپورٹ پروگرام کے علاوہ یہ کورونا میں عوام کی مدد کر سکے ۔ آصف زرداری نے کہا کہ اناڑی حکمرانوں نے آج ملک کے تمام اشاریے منفی کر دیے۔ میں نے پہلے کہا تھا یہ سلیکٹڈ حکمران اپنے وزن سے خود گریں گے، اب یہ گر چکے ہیں، بس اب ایک آخری دھکے کی ضرورت ہے، پی ڈی ایم کے ساتھ مل کر پیپلز پارٹی اس ناکام اور نااہل ٹولے کو گھر بھیجے گی۔
