سکھر (نمائندہ جسارت) سندھ کے تیسرے بڑے شر سکھر میں رہائشی و کاروباری مراکز میں صفائی ستھرائی کے ناقص انتظامات کے باعث جگہ جگہ گندگی کے ڈھیر اور نکاسی آب کا نظام مفلوج ہوجانے کی وجہ سے شہریوں کی زندگی اجیرن ہوگئی۔ ان خیالات کا اظہار راجپوت بندھانی ویلفیئر ایسوسی ایشن کے صدر حاجی محمد شریف بندھانی نے اپنے دفتر میں شہریوں کے وفد سے گفتگو کے دوران کیا۔ اس موقع پر ان کے ہمراہ عبدالغفار عرف پپی، فہیم بندھانی ودیگر بھی موجود تھے۔ اس موقع پر حاجی محمد شریف بندھانی کا مزید کہنا تھا کہ انتہائی افسوس کیساتھ کہنا پڑتا ہے کہ بلدیاتی دور کے اختتام کے بعد ایڈمنسٹریٹر کی تعیناتی پر شہریوں نے امید باندھی تھی کہ شہر میں صفائی کا نظام بہتر ہوگا لیکن بلدیاتی دور سے زیادہ اب شہر کا بیڑا غرق ہوگیا ہے، ایسا لگتا ہے سرکاری افسران کو شہر اور شہریوں کو درپیش مسائل حل کرنے میں کوئی دلچسپی نہیں، شہر میں گندگی کے ڈھیروں سے اٹھنے والے تعفن کی وجہ سے وبائی امراض و بیماریاں پھیل رہی ہیں، شکایات کے باوجود انتظامیہ اور متعلقہ محکموں کے کانوں پر جوں تک نہیں رینگ رہی۔ صفائی کا عملہ سیاسی اور سرکاری افسران کے بنگلوں پر ڈیوٹیاں دے رہا ہے لیکن شہر میں صفائی کے نظام کو بہتر بنانے کے لیے کوئی اقدام نہیں کیے جارہے۔ انہوں نے صوبائی وزیر بلدیات سید ناصر حسین شاہ و دیگر حکام سے نوٹس لے کر شہریوں کو بنیادی و بلدیاتی سہولیات فراہمی کا مطالبہ کیا ہے۔
