اسلام آباد(اے پی پی )صوبائی وزیر برائے کالونی و جیل خانہ جات فیاض الحسن چوہان نے کہا ہے کہ مریم صفدر سانحہ مچھ پر اپنی سیاست چمکانے کی کوشش کر رہی ہیں، نارووال کے ارسطو احسن اقبال عوام اور دنیا کی آنکھوں میں دھول جھونکنے کے لیے غلط بیان بازی کر رہے ہیں، اگر ن لیگ سانحہ ماڈل ٹائون میں ملوث نہیں تھی تو ایف آئی آر کٹوانے میں اتنی مشکلات کیوں تھیں؟ عوامی تحریک کے دھرنے کے بعد سانحہ ماڈل ٹائون کی ایف آئی آر کاٹی گئی تھی۔ ہفتے کو احسن اقبال کے بیان پر ردعمل دیتے ہوئے انہوں نے کہا کہ ن لیگ سانحہ مچھ پر سیاست کر رہی ہے، مریم صفدر وزیراعظم عمران خان سے کوئٹہ جانے کا مطالبہ کر رہی تھیں، میں مریم صفدر سے پوچھتا ہوں کہ جب سانحہ ماڈل ٹائون ہوا تھا تو کیا نواز شریف جو اس وقت وزیراعظم تھے، وہ اور شہباز شریف سانحہ ماڈل ٹائون کے لواحقین کے ساتھ دادرسی کے لیے گئے تھے؟ وزیراعظم عمران خان نے کوئٹہ جا کر سانحہ مچھ لواحقین کی دادرسی کی ہے۔
