کاؤنٹر ٹیررازم ڈیپارٹمنٹ(سی ٹی ڈی) نے اسلام آباد اسٹاک ایکس چینج پر حملے کا منصوبہ ناکام بناتے ہوئے 3 دہشتگردوں کو گرفتار کر لیا۔
سی ٹی ڈی لاہور کے مطابق راولپنڈی بم دھماکوں میں ملوث 3 دہشتگردوں کو گرفتار کیا گیا ہے جنہوں نے دوران تفتیش 4 بم دھماکوں میں ملوث ہونے کا اعتراف کیا ہے۔
حکام نے بتایا کہ گرفتار دہشتگردوں کے قبضے سے دھماکا خیز مواد بھی برآمد ہوا ہے، دہشتگردوں کا افغانستان میں رابطوں کا انکشاف ہوا ہے ۔
سی ٹی ڈی حکام کا کہنا ہے کہ دہشتگرد اسلام آباد اسٹاک ایکس چین پر حملے کی منصوبہ بندی کررہے تھے اور بروقت کارروائی کرکے ان کے مذموم عزائم کو خاک میں ملا دیا گیا ہے۔
سی ٹی ڈی کے مطابق افغانستان میں کالعدم تنظیم نے دہشتگردوں کی مالی معاونت کی ہے اور گرفتار ملزمان سے تفتیش کی جارہی ہے۔
واضح رہے کہ گزشتہ روز بھی راولپنڈی میں دستی بم حملے میں 20 سے زائد افراد زخمی ہوگئے تھے۔
