راولپنڈی ( آن لائن ) راولپنڈی، اسلام آباد میں میٹروبس ملازمین نے دوبارہ ہڑتال کردی۔ ملازمین کا کہنا ہے کہ میٹرو انتظامیہ نے پچھلے احتجاج کے نتیجے میں کیے گئے وعدے پورے نہیں کیے۔ ملازمین نے تمام اسٹیشنز پر ٹکٹنگ بوتھ بند کردیے جس کے نتیجے میں مسافروں کو شدید پریشانی کا سامنا ہے۔ میٹرو بس ٹکٹنگ ملازمین نے تنخواہ اور کورونا فنڈز نہ ملنے پر گزشتہ ماہ ہڑتال کرکے میٹرو ٹریک پر2 روز تک دھرنا دیا تھا جس پر میٹرو بس انتظامیہ نے تمام واجبات ادا کرنے کی یقین دہانی کرائی تھی اور ملازمین نے احتجاج ختم کرکے میٹروبس سروس بحال کردی تھی۔ ملازمین نے اب دوبارہ ہڑتال کرتے ہوئے کہا کہ میٹرو بس انتظامیہ نے کوئی بھی وعدہ پورا نہیں کیا، ملازمین کو4 ماہ سے تنخواہ اور دیگر واجبات ادا نہیں کیے، جس پر ملازمین نے دوبارہ احتجاج شروع کردیا ہے، پہلے مرحلے میں ٹکٹنگ بوتھ بند کیا ہے، پھر اگلے مرحلے میں میٹروبس سروس مکمل بند کردیں گے۔
