سکھر( نمائندہ جسارت) میونسپل کمیٹی روہڑی کے سامنے ملازمین کا تنخواہیں نہ ملنے کے خلاف احتجاجی مظاہرہ، نعرے بازی فوری تنخواہیں فراہم کرنے کا مطالبہ۔ تفصیلات کے مطابق میونسپل کمیٹی روہڑی کی مختلف واٹر سپلائی اسکیموں پر کام کرنے والے ملازمین نے علی شیر سولنگی،گلبہار ملاح اوراصغر علی پلھ کی قیادت میں احتجاجی مظاہرہ کرتے ہوئے تنخواہوں کی فراہمی کیلیے نعرے بازی کی۔مظاہرین کا کہنا تھا کہ صوبائی حکومت نے 28اگست تک ملازمین کو تنخواہیں دینے کا اعلان کیا تھا لیکن میونسپل کمیٹی روہڑی میں آج تنخواہ چلی لیکن واٹر سپلائی اسکیموں پر ڈیوٹیاں انجام دینے والے180 سے زائد ملازمین کی تنخواہیں نہیں بھیجی گئیں ہیں تنخواہوں کی عدم فراہمی کے باعث ہمارے گھروں میں نوبت فاقہ کشی تک پہنچ چکی ہے، دکانداروں نے مزید سودا سلف ادھار دینے سے انکار کردیا ہے تنخواہیں جاری نہ کی گئیں تو احتجاج کا دائرہ بڑھا دیا جائے گا ۔بعد ازاں میونسپل افسران نے ملازمین کو تنخواہیں فراہم کرنے کی یقین دہانی کرواکر احتجاجی مظاہرہ ختم کروادیا۔
