ٹنڈو محمد خان (نمائندہ جسارت) سابق صدر آصف زرداری کو نیب کی جانب سے راولپنڈی بلانا ساز ش ہے ، راولپنڈی نے ہمیشہ پیپلزپارٹی کی قیادت کو شہید کیا، سابق صدر آصف علی زرداری اکیلے پنڈی نہیں جائیں گے ، بلکہ پورے ملک کے جیالے آصف علی زرداری کیساتھ ہیں ، نیب والوں تیاری کرلو جیالے راولپنڈی آرہے ہیں ، پیپلز پارٹی کے ضلعی رہنماؤں ڈاکٹر میر حسن ملا ح ،شیر امین لاکھو، معشوق بھٹی ، غلام حیدر شاہ ، گلزار احمد بھٹی ، پپن بھٹی، ڈاکٹر ایوب جت، محمد علی قریشی ، شہک خان رند ودیگر کی پریس کلب ٹنڈومحمدخان میں پریس کانفرنس۔ پاکستان پیپلز پارٹی ضلع ٹنڈومحمدخان کے رہنماؤں ڈاکٹر میر حسن ملاح ، شیر امین لاکھو ، معشوق بھٹی ، ڈاکٹر ایوب جت ، غلام حیدر شاہ ، گلزار بھٹی ، محمد علی قریشی ، ڈاکٹر جام زؤر ، اخترمیمن ودیگر نے پریس کلب ٹنڈومحمدخان میں پریس کانفرنس کرتے ہوئے کہاکہ نیب انتقام پر اتر آیا ہے ، ایک سوچی سمجھی سازش کے تحت پیپلز پارٹی کے کو چیئرمین آصف علی زرداری کو17 اگست کو راولپنڈی میں طلب کیا گیا ہے، جس کو ہم سازش سمجھتے ہیں، راولپنڈی نے ہمیشہ پیپلز پارٹی کو لاشوں کے تحفے دیے، محترمہ بینظیر بھٹو کو راولپنڈی میں شہید کیا گیا، اب نیب سابق صدر آصف زرداری کو راولپنڈی بلا رہی ہے، ہم سمجھتے ہیں کہ سابق صدر آصف علی زرداری کی جان کو خطرہ ہے۔ سابق صدر نے ہمیشہ جمہوریت کی مضبوطی کے لیے قربانی دی جس کی سزا آج آصف علی زرداری اور پیپلز پارٹی کو دی جارہی ہے۔
