کراچی (اسٹاف رپورٹر) ٹینس اسٹار اعصام الحق کو پاکستان اولمپکس ڈے کی مناسبت سے انسٹا گرام پر انٹرنیشنل اولمپکس کمیٹی (پی او سی) براہ راست سیشن میں پاکستان کی نمائندگی کیلئے نامزد کیا گیا ہے۔ پی ٹی ایف کی جانب سے جاری بیان میں کہا گیا ہے کہ اعصام کو دنیا کے 23 ایتھلیٹس اور اولمپین سمیت نامزد کیا گیا۔ پاکستان ٹینس فیڈریشن (پی ٹی ایف) نے کہا کہ فیڈریشن اور ٹینس کیلئے یہ بہت فخر کی بات ہے کہ اعصام الحق کو پاکستان کی نمائندگی کے لئے نامزد کیا گیا۔ اولمپک ڈے ہمیشہ ہی اولمپک کے فیملی کیلئے سالانہ کیلنڈر کا سب سے زیادہ اہم ایونٹ ہوتا رہا لیکن موجودہ کووڈ۔19 کی وجہ سے پاکستان اولمپک ایسوسی ایشن (پی او اے) اور ملک سے کھلاڑیوں نے دنیا کے سب سے بڑے آن لائن اولمپک میں شرکت کی۔ ہم نے اعصام کے ذریعہ منعقدہ لائیو سیشن میں ڈیجیٹل موجودگی ظاہر کرکے اسے مکمل طور پر منایا۔ اولمپک ڈے 2020ء کی روح کو متحرک کرنے کیلئے پی او اے نے تمام فیڈریشنز ، ڈیپارٹمنٹس اور کھلاڑیوں کو اس میں شامل کیا اور تعلیمی اداروں کو ای میلز بھی ارسال کیں تاکہ ملک سے ایک بڑا گروپ اولمپکس کے ساتھ اظہار یکجہتی کیلئے براہ راست انسٹاگرام سیشن میں شرکت کو یقینی بنایا جا سکے۔ واضح رہے اس سرگرمی میںدنیا سے کھیلوں کے ٹاپ اسٹارز شریک ہوئے۔ ٹینس اسٹار اعصام الحق نے پاکستان کی نمائندگی کا اعزاز حاصل کیا۔ اولمپک ڈے کا مقصد نئی نسل کو المپک ازم سے آگاہی دینا ہے۔
