سانگھڑ،رینجرزکی کارروائی، غیر ملکی گٹکے کی بڑی کھیپ پکڑ لی

سانگھڑ (نمائندہ جسارت)ضلع سانگھڑ کی تحصیل کھپرو کے شہر ہتھنگو میں سندھ رینجرز کی بڑی کارروائی ذخیرہ شدہ غیر ملکی گٹکے کی 5 کروڑ 60 لاکھ روپے مالیت کی بڑی کھیپ اندرون ملک وصوبہ اسمگلنگ کرنے کی کوشش ناکام بنادی۔تفصیلات کے مطابق سندھ رینجرز کی ایک ٹیم نے انٹیلی جنس معلومات کی بنیاد پر ضلع سانگھڑ کی تحصیل کھپرو کے شہر ہتھنگو میں کارروائی کرتے ہوئے اندرون ملک واندرون صوبہ اور اندرون ضلع غیر ملکی گٹکے کی بڑی کھیپ اسمگلنگ کرنے کی کوشش کو ناکام بنایا گیا۔جس میں 24310 پیکٹس گولڈ گٹکا،23656 پیکٹس ،آداب گٹکا اور 2100 پیکٹس سفینہ گٹکا برآمد کیا گیا اور تمام گٹکا کسٹم حکام کے حوالے کردیا گیا جس کی پاکستانی کرنسی میں مالیت 5 کروڑ 58 لاکھ روپے ہے۔تاہم اس بڑی کارروائی میں کوئی گرفتاری نہیں دکھائی گئی ہے۔جبکہ اہم ذرائع سے پتا چلا کہ یہ تمام مال کھپرو کے ایک بڑے سفینہ گٹکے کے ڈیلر کا تھا جو بڑے ڈیلروں کو سپلائی کرنا تھا۔