لاڑکانہ (اے پی پی) پاکستان پیپلزپارٹی کے چیئرمین بلاول زرداری کا کہنا تھا کہ زندگی سے بڑھ کر کوئی قیمتی اثاثہ نہیں، سماجی فاصلہ رکھ کر زندگیوں کو محفوظ بنایا جاسکتا ہے۔ ان خیالات کا انہوں نے نوڈیرو ہاؤس میں سادگی کے ساتھ عید مناتے ہوئے کیا۔بلاول زرداری نے کہا کہ عید کے موقع پر قوم کے لیے قربانی دینے والوں کی جدوجہد کو ضرور یاد رکھیں، آج ہم طیارہ حادثے کے المناک واقعے کی یادوں کے ساتھ عید منارہے ہیں، اس عید کو اپنے شہداء کے نام کریں، اس عید کو ان ڈاکٹرز، نرسوں اور پیرامیڈیکل اسٹاف کے نام کرنا چاہیے جو کورونا وائرس کے خلاف جدوجہد کررہے ہیں۔ بلاول زرداری نے سماجی فاصلے کے اصول و ضوابط کو ملحوظ خاطر رکھتے ہوئے گڑھی خدا بخش میں شہید ذوالفقار علی بھٹو، نصرت بھٹو، شہید بے نظیر بھٹو، میر شاہنواز بھٹو اور میر مرتضیٰ بھٹو کے مزارات پر حاضری دی اور پھول چڑھائے۔
