راولپنڈی (نمائندہ خصوصی) پاکستان سپر لیگ کے سلسلے میں اسلام آباد یونائیٹڈ اور پشاور زلمی کی ٹیموں کے درمیان کھیلے گئے میچ میںڈک ورتھ لوئس سسٹم کے تحت پشاور زلمی کی ٹیم 7رنز سے کامیاب ہو گئی جبکہ بارش کی وجہ سے اسلام آباد یونائیٹڈ کی ٹیم کو شکست کا سامنا کرنا پڑا۔پنڈی کرکٹ اسٹیڈیم میں کھیلے گئے پاکستان سپر لیگ کے5ویں ایڈیشن کے اسلام آباد یونائیٹڈ اور پشاور زلمی کی ٹیموں کے درمیان کھیلے گئے 20ویں میچ میںپشاور زلمی کے کپتان وہاب ریاض نے ٹاس جیت کر پہلے فیلڈنگ کا فیصلہ کیا۔اسلام آباد یونائیٹڈ کی جانب سے لیوک رونکی اور کولن منرو نے بیٹنگ جبکہ پشاور زلمی کی جانب سے راحت علی اور شعیب ملک نے بولنگ کا آغاز کیا۔اسلام آباد یونائیٹڈ کو پہلا نقصان 6رنز کے مجموعی اسکور پر اٹھانا پڑا جب اوپنر رونکی صرف6رنز بنا کر راحت علی کی گیندپروہاب ریاض کے ہاتھوں کیچ ہو گئے۔اسلام آباد یونائیٹڈکی ٹیم نے اپنے 50رنز 5.2اوورزمیں جبکہ 100رنز 9اوورزمیں مکمل کیئے۔ اسلام آباد یونائیٹڈکی تیسری وکٹ 108رنز کے مجموعی اسکورپر گر گئی جب دوسرے اوپنر کولن منرو52رنز بنا کر بریتھ ویٹ کی گیند پر لیونگ اسٹون کے ہاتھوں کیچ ہو گئے،انہوں نے 35گیندوں پر4چوکوں اور دو چھکوں کی مدد سے52رنز بنائے۔جس کے بعد کولن انگرام بیٹنگ کیلئے آئے۔اس دوران شاداب خان نے اپنی نصف سنچری 26گیندوں پر4چوکوں اور3چھکوں کی مدد سے مکمل کرلی۔ اسلام آباد یونائیٹڈکے149رنز کے مجموعی اسکور پر شعیب ملک نے راحت علی کی گیند پر انگرام(19رنز) کا، 159کے مجموعی اسکور پرشعیب ملک نے ایک مرتبہ پھر بریتھ ویٹ کی گیند پر شاداب خان(62رنز)کا جبکہ 164رنز پر حیدر علی نے وہاب ریاض کی گیند پرشاداب خان (65رنز)کاکیچ چھوڑ دیا۔ اسلام آباد یونائیٹڈکی چوتھی وکٹ 184رنز کے مجموعی ا سکور پر گر گئی جب کولن انگرام 41رنز بنا نکر حسن علی کی گیند پر لیونگ ا سٹون کے ہاتھوں بائونڈری پر کیچ ہو گئے۔اس موقع پر آصف علی بیٹنگ کیلئے آئے۔189رنز کے مجموعی اسکور پر اسلام آباد یونائیٹڈ کی 5ویں وکٹ گر گئی جب کپتان شاداب خان 77رنز بنا کر وہاب ریاض کی گیند پر لیونگ اسٹون کے ہاتھوں کیچ ہوگئے۔ شاداب خان نے 42گیندوں پر 5چوکوں اور4چھکوں کی مدد سے 77رنز بنائے۔ان کے بعد فہیم اشرف بیٹنگ کیلئے آئے۔ اسلام آباد یونائیٹڈ کی ٹیم نے مقررہ 20اوورزمیں 5وکٹوں کے نقصان پر195رنز بنائے،آصف علی نے آئوٹ ہوئے بغیر03 رنز جبکہ فہیم اشرف نے بھی آئوٹ ہوئے بغیر03 رنز بنائے۔پشاور زلمی کی جانب سے حسن علی نے 4اوورزمیں 36رنز کے عوض 2وکٹیں حاصل کیں۔جواب میں پشاور زلمی کی جانب سے کامران اکمل اورامام الحق نے بیٹنگ جبکہ اسلام آباد یونائیٹڈ کی جانب سے ڈیل اسٹین اور رومان رئیس نے باولنگ کا آغاز کیا۔پشاور زلمی کی ٹیم کو 44رنز کے مجموعی اسکور پر پہلا نقصان اٹھانا پڑا جب اوپنر امام الحق صرف 7رنز بنا کر رومان رئیس کی گیند پر ظفر گوہر کے ہاتھوں کیچ ہو گئے۔ون ڈاون پوزیشن پر ٹام بینٹن بیٹنگ کیلئے آئے۔پشاور زلمی کی ٹیم نے اپنے 50رنز 5اوورز میں مکمل کیئے۔پشاور زلمی کے مجموعی ا سکور 63رنز پر عاکف جاوید نے ظفر گوہر کی گیند پر ٹام بینٹن(16رنز) ایک آسان کیچ چھوڑ دیا۔64رنز کے مجموعی اسکور پر پشاور زلمی کی دوسری وکٹ گر گئی جب دوسرے اوپنر کامران اکمل 37رنز بنا کر ظفر گوہر کی گیند پر فہیم اشرف کے ہاتھوں کیچ ہوگئے۔جس کے بعد حیدر علی بیٹنگ کیلئے آئے۔پشاور زلمی کا ا سکور 9اوورز میں2 وکٹوں کے نقصان پر 85رنز تھا تو بارش کی وجہ سے کھیل روک دیا گیااور دوبارہ کھیل شروع نہیں ہو سکا اور ڈک ورتھ لوئس سسٹم کے تحت پشاور زلمی 7رنز سے کامیاب ہو گئی۔ٹام بینٹن نے آئوٹ ہوئے بغیر20رنز جبکہ حیدر علی نے آئوٹ ہوئے بغیر16رنز بنائے۔اسلام آباد یونائیٹڈ کی جانب سے ظفر گوہر نے 2 اوورز میں 11رنز اور رومان رئیس نے ایک اوور میں 20رنز کے عوض ایک،ایک وکٹ حاصل کی ،اسلام آباد یونائیٹڈ کے کپتان شاداب خان کو شاندار اننگ کھیلنے پر’مین آف دی میچ ‘کے ایوارڈ کا حقدار قرار دیا گیا۔
