تحقیقاتی رپورٹ منظر عام پر نہ آنے سے چینی چوری ہو رہی ہے، شہباز شریف

اپوزیشن لیڈر شہبازشریف نے چینی کی قیمتوں میں2روپے فی کلو مزید اضافے کی مذمت کرتے ہوئے کہا ہے کہ چینی کی قیمت میں مزید2روپے کلو اضافہ فی الفور واپس لیا جائے ۔

میڈیا کو جاری بیان میں شہباز شریف نے کہا کہ چینی چوری کی تحقیقاتی رپورٹ عمران نیازی کے دراز میں بند ہے، یہ رپورٹ عوام کے سامنے نہیں آ رہی اسی لئے چینی چوری ہو رہی ہے،عمران نیازی بیان دے کر اور وعدہ کرکے بھول جاتے ہیں۔

شہباز شریف نے کہا کہ حقائق اور شواہد بتارہے ہیں کہ حکومت کو صرف مال کمانے سے دلچسپی ہے، عمران نیازی کے اپنے فارمولے کے مطابق وزیراعظم چور ہے، حکومت نے چینی چوری اور پابندی کے باوجود برآمد پر قوم کو اب تک حقائق نہیں بتائے۔

اپوزیشن لیڈر کا کہنا تھا کہ چینی پر تحقیقات کے علاوہ عمران نیازی کےوعدوں پر بھی کمیشن بننا چاہیے، عمران نیازی قیمتوں میں کمی کے جھوٹے ٹوئٹ کر رہے ہیں جب کہ عمران نیازی کے اردگرد بیٹھے حواری چینی کی قیمت بڑھا کر مال کما رہے ہیں۔