کوئٹہ (نمائندہ جسارت) بلوچستان میں مختلف واقعات کے دوران دو خواتین سمیت چھے افراد جاں بحق، دو زخمی ہوگئے۔ ضلع خضدار میں سمان کے مقام پر بس اور گاڑی میں تصادم کے نتیجے میں خاتون سمیت 5 افراد شدید زخمی ہوگئے، زخمیوں کو گورنمنٹ ٹیچنگ اسپتال منتقل کیا گیا جہاں حاجی محمد ایوب، بی بی گل، محمد ایاز اور محمد نعیم زخموں کی تاب نہ لاتے ہوئے چل بسے، میتیں ضروری کارروائی کے بعد ورثا کے حوالے کردی گئیں جبکہ ایک زخمی شعیب احمد ولد بہار خان تاحال اسپتال میں زیر علاج ہے۔ حادثے کے حوالے سے تحقیقات جاری ہیں۔ ضلع ڈیرہ بگٹی کے علاقے دشت گوران میں دو گروپ زمین کے تنازعے پر آپس میں الجھ پڑے، فائرنگ کے نتیجے میں 1 شخص جاں بحق، دوسرا زخمی ہوگیا۔ اطلاع ملتے ہی فورسز کی بھاری نفری موقع پر پہنچ گئی اور تصادم رکوا کر لاش اور زخمی کو اسپتال منتقل کیا۔ ضلع سبی کے علاقے ایری گیشن کالونی میں گھر سے خاتون کی لاش برآمد ہوئی جسے گولیاں مار کر قتل کیا گیا۔ لاش کو اسپتال منتقل کردیا گیا، جہاں ضابطے کی کارروائی جاری ہے۔ پولیس نے واقعے کی تحقیقات شروع کردی ہیں۔
