بینکاک (انٹرنیشنل ڈیسک) تھائی لینڈ کے شمال مشرقی علاقے میں ایک فوجی نے لوگوں پر اندھادھند فائرنگ کردی، جس کے نتیجے میں 20 افراد ہلاک اور 21 ہوگئے۔ خبررساں اداروں کے مطابق ہفتے کے روز فائرنگ کا یہ واقعہ بینکاک سے 250 کلومیٹر دور ناکھون ریشسیما شہر میں پیش آیا ہے۔پولیس نے بتایا ہے کہ فائرنگ کرنے والا فوجی شہر سے باہر تعینات تھا۔اس نے پہلے اپنے ایک کمانڈر اور 2ساتھی فوجیوں کے علاوہ ایک عورت کو گولی مار کر ہلاک اور ایک شخص کو زخمی کیا۔ اس شہر کے پولیس افسروں نے اپنی شناخت ظاہر نہ کرنے کی شرط پربتایا ہے کہ اس کے بعد اس فوجی نے اپنے اڈے سے بندوق لی اور گاڑی پر مصروف شاپنگ مال ٹرمینل 21 کی جانب چلا گیا اور راستے میں بھی فائرنگ کرتا رہا تھا، جہاں اس نے خون کی ہولی کھیلی۔ اس شاپنگ مال کے باہر کی ایک وڈیو سوشل میڈیا پر شیئر کی گئی ہے۔اس میں لوگوں کو پارکنگ کی جگہ پر جانیں بچانے کے لیے چھپتے ہوئے دیکھا جاسکتا ہے اور گولیاں چلنے کی آوازیں سنائی دے رہی ہیں۔ مسلح فوجی نے شاپنگ مال میں گھسنے کے بعد فائرنگ جاری رکھی۔ اس دوران حکام نے خریداری مرکز اور اس کے باہر کی شاہراہ کو بند کردیا۔ پولیس کے مطابق جکراپنتھ نامی مشتبہ حملہ آور نے اپنے فیس بک اکاؤنٹ پر فائرنگ سے پہلے ایک پوسٹ بھی شائع کی، جس میں لکھا کہ موت سب کے لیے لازم ہے۔ اس نے فیس بک پر لکھا کہ اسے خود کو حکام کے حوالے کر دینا چاہیے۔ ایک اور پوسٹ میں اس نے لکھا کہ جذبے کا وقت آ گیا ہے۔ تاہم فیس بک نے تھوڑی ہی دیر بعد پوسٹ ہٹا دی۔ جب کہ اس دوران حملہ آور کے فرار ہوجانے اور شاپنگ مال میں شہریوں کو یرغمال بنانے سمیت متضاد خبریں گردش کرتی رہیں۔تھائی وزارت دفاع کے ترجمان لیفٹیننٹ جنرل کانگ چیپ تنترا وانیخ نے فوجی کی شناخت ظاہر کرتے ہوئے بتایا کہ پولیس اور فوجی یونٹوں نے اس کی گرفتاری کے لیے شاپنگ مال اور اس کے نواحی علاقے کا گھیراؤ کیا۔ حکام نے واقعے کی تحقیقات شروع کردی ہے۔
