راولپنڈی ٹیسٹ کا پہلا روز بولرز کے نام،مہمان ٹیم 233 پر آئوٹ

راولپنڈی (نمائندہ خصوصی)پاکستان اور بنگلا دیش کے مابین پہلے ٹیسٹ کے پہلے روز شاہین شاہ کی شاندار بولنگ کی وجہ سے مہمان ٹیم82.5اوورز میں233رنز بنا کر آئوٹ ہو گئی۔بنگلا دیش کی جانب سے محمد مٹھن63، نجم الحسن44،لٹن داس33،کپتان مومن الحق 30 اور محمد اللہ25رنز بنا کر نمایاں بلے باز رہے۔پاکستان کی جانب سے شاہین شاہ آفریدی نے 4، محمد عباس، حارث سہیل نے 2،2جبکہ نسیم شاہ ایک وکٹ حاصل کی۔ٹیسٹ میچ کے دوسرے روز آج پاکستان اپنی پہلی اننگز کا آغاز کریگا۔جمعہ کوراولپنڈی کرکٹ اسٹیڈیم میں پاکستان اور بنگلا دیش کے درمیان کھیلے جانے والی ٹیسٹ سیریز کے پہلے میچ میں قومی ٹیم کے کپتان اظہر علی نے ٹاس جیت کر مہمان ٹیم کو بیٹنگ کی دعوت دی ۔بنگلا دیش کی جانب سے تمیم اقبال اور سیف حسن نے اننگز کا آغاز کیا ہی تھا کہ پہلے ہی اوور میں سیف حسن صفر کے انفرادی اسکور پر شاہین شاہ آفریدی کے ہاتھوں کیچ آئوٹ ہوئے۔سیف حسن کے بعد تمیم اقبال دوسرے اوور میں 5گیندوں پر صرف 3رنز بنا کر محمد عباس کے ہاتھوں ایل بی ڈبلیو ہوگئے۔دونوں اوپنرز کے پویلین لوٹنے کے بعد مومن الحق 62کے مجموعی اسکور پر 30رنز بناکر شاہین آفریدی کی گیند پر محمد رضوان کو کیچ تھما بیٹھے۔جس کے بعد نجم الحسین شانتو وکٹ پر کچھ دیر ٹھہرنے میں کامیاب ہوئے تاہم 44رنز بنانے کے بعد 95کے مجموعی اسکور پر محمد عباس کے کیچ آوٹ کا شکار ہوگئے اور پھر محمود اللہ 107کے اسکور پر شاہین آفریدی کے گیند پر اسد شفیق کے ہاتھوں کیچ آوٹ ہوگئے۔حمد مٹھن اور لٹن داس نے بھی مزاحمتی اننگز کھیلی اور کچھوے کی طرح چال چلتے ہوئے اسکور کو آگے بڑھایا ۔ دونوں کے درمیان 50 رنز کی بھی پارٹنر شپ بنی۔ لٹن داس 46گیندوں پر 33رنز بنا کر پارٹ ٹائم فاسٹ بولر حارث سہیل کی گیند پر ایل بی ڈبلیو ہو گئے۔تیج الاسلام اور محمد مٹھن کے درمیان بھی 50 رنز کی شراکت داری بنی، دونوں نے محتاط انداز میں بیٹنگ کرتے ہوئے اسکور کو آگے بڑھایا، تاہم تیج الاسلام حارث سہیل کی گیند پر یاسر شاہ کو کیچ دے بیٹھے، انہوں نے 72گیندوں کا سامنا کرتے ہوئے 24رنز کی اننگز کھیلی۔ روبیل حسین ایک رن بنا کر شاہین شاہ آفریدی کی گیند پر بولڈ ہو گئے۔82.5اوورز میں233کے مجموعی اسکور پر فاسٹ بولر نسیم شاہ نے مزاحمتی اننگز کھیلنے والے بیٹسمین محمد مٹھن کو پویلین بھیجا، مہمان بیٹسمین نے 140گیندوں پر 63رنز کی باری کھیلی، وکٹ کے عقب میں محمد رضوان نے انکاکیچ تھاما۔پاکستان کی جانب سے شاہین شاہ آفریدی نے 4، محمد عباس، حارث سہیل نے 2،2جبکہ نسیم شاہ ایک وکٹ حاصل کی۔ٹیسٹ میچ کے دوسرے روز آج پاکستان اپنی پہلی اننگز کا آغاز کریگا۔
راولپنڈی ٹیسٹ: پاکستانی بولر یاسر شاہ بنگلادیش کے خلاف پہلے ٹیسٹ کے پہلے روز کیچ پکڑے ہوئے ،بنگلادیشی بلے باز نصف سنچری اسکور کرنے کے بعد دادوصول کرتے ہوئے ،تیسری تصویر میں بلے باز بائونسر سے بچنے کی کوشش کررہا ہے ،قومی بولرکا جارحانہ انداز،بنگلادیشی بلے باز شاٹ کھیلتے ہوئے