اسلام آباد (جسارت نیوز) تعلیمی بورڈ پشاور نے انٹر بورڈ اسپورٹس گالا 2020ء کے ٹیبل ٹینس کا ٹائٹل اپنے نام کر لیا۔ پیر کو پاکستان ا سپورٹس کمپلیکس اسلام آباد میں ایونٹ کے تیسرے دن ٹیبل ٹینس کے فائنل میں تعلیمی بورڈ پشاور نے تعلیمی بورڈ سوات کو 0۔2 سے شکست دے کر فائنل اپنے نام کر لیا۔ تیسری پوزیشن میچ میں ٹیکنیکل ایجوکیشن بورڈ پشاور نے انٹرمیڈیٹ بورڈ کراچی کو 0۔2 سے شکست دے کر تیسری پوزیشن اپنے نام کی۔ دریں اثنا بیڈمنٹن کے کوارٹر فائنل میچز میں تعلیمی بورڈ پشاور، ملتان بورڈ، ٹیکنیکل بورڈ پشاور اور گوجرانوالا بورڈ نے سیمی فائنل کیلئے کوالیفائی کر لیا۔ پہلے میچ میں پشاور بورڈ نے مردان بورڈ کو 0۔2 سے شکست دیدی۔ دوسرے میچ میں ٹیکنیکل بورڈ پشاور نے ساہیوال کو 0۔2 سے شکست دی۔ تیسرے میچ میں گوجرانوالا نے فیصل آباد کو 1۔2 سے شکست دیدی جبکہ چوتھے میچ میں ملتان نے میرپور آزاد کشمیر کو 0۔2 سے شکست دیدی۔
