لاڑکانہ (نمائندہ جسارت) جامعہ بے نظیر بھٹو اور اس کے زیر انتظام بی بی آصفہ ڈینٹل کالج کے ملازمین کی جانب سے احتجاجی مظاہرہ کیا گیا۔ بی بی آصفہ ڈینٹل کالج کے ڈیلی ویجز ملازمین نے مستقل نہ کرنے کیخلاف قرآن پاک ہاتھوں میں اٹھاکر وی سی سیکرٹریٹ کے سامنے احتجاجی مظاہرہ کیا۔ اس موقع پر سید سیدل شاہ، سید امیر علی شاہ، عاشق علی میرانی و دیگر کا کہنا تھا کہ سال 2012ء سے ملازمت کرنے کے باوجود ہمیں مستقل نہیں کیا جارہا جبکہ ہم نے پیپلز پارٹی رہنماؤں اور وی سی سے ناامید ہوکر اب اپیل کرتے ہیں کہ خدارا ہمیں مستقل کرکے پریشانی دور کی جائے۔ دوسری جانب جامعہ بے نظیر بھٹو کے ملازمین نے ایمپلائز ویلفیئر ایسوسی ایشن کی جانب سے دسویں روز بھی قلم چھوڑ ہڑتال کرکے چانڈکا میڈیکل کالج کے مرکزی گیٹ کے سامنے احتجاجی مظاہرہ کرکے دھرنا دیا گیا۔ اس موقع پر ذوالفقار شر، نور محمد ہلیو و دیگر نے مطالبہ کیا کہ میڈیکل کارڈ، سن کوٹا، ڈی پی سی، سینڈیکیٹ میں درخواست، سرکاری کوارٹر خالی کروا کر، وردی الائونس، ایمبولنس سمیت دیگر مطالبات منظور کیے جائیں، بصورت دیگر احتجاج کا دائرہ وسیع کریں گے۔
