ملتان (صباح نیوز) ملتان ائرپورٹ پر مسافر کو کھانسنا اتنا مہنگا پڑا کہ وفاقی تحقیقاتی ادارے (ایف آئی اے) کے اہلکار نے مسافر کے پاسپورٹ پر ویزے والا صفحہ ہی پھاڑ دیا، ایف آئی اے ترجمان محمد ذیشان کے مطابق اے ایس آئی ابوبکر کو معطل کر کے انکوائری شروع کر دی گئی ہے۔ مسافر ڈاکٹر فیصل کا کہنا ہے کہ وہ جرمنی سے ملتان ائرپورٹ پہنچا تو ایف آئی اے امیگریشن کائونٹر پر انہیں کھانسی آگئی۔کاؤنٹر پر موجود ایف آئی اے کے اے ایس آئی ابو بکر نے کہا کہ اپنے منہ پر ہاتھ کیوں نہیں رکھا؟ اس کے بعد تلخ کلامی پر اہلکار نے پاسپورٹ ڈاکٹر فیصل کے منہ پر دے مارا۔ ڈاکٹر فیصل نے الزام لگایا کہ ایف آئی اے اہلکاروں نے پاسپورٹ چھین لیا اور کچھ دیر کے بعد ویزے والا صفحہ پھاڑ کر واپس کر دیا۔
