راولپنڈی (جسارت نیوز)اسپورٹس ڈیپارٹمنٹ راولپنڈی اور ڈسٹرکٹ ہاکی ایسوسی ایشن کے زیر اہتمام اولمپئن محمد اشفاق میموریل ہاکی ٹورنامنٹ 17 جنوری سے شہناز شیخ ہاکی اسٹیڈیم راولپنڈی میں شروع ہوگا۔ کانگریس ممبر پی ایچ ایف اور ریپ پنجاب ہاکی ایسوسی ایشن محمد یاسین نے اے پی پی کو بتایا کہ اولمپئن اشفاق احمد (مرحوم) کو خراج عقیدت پیش کرنے کیلیے اسپورٹس ڈیپارٹمنٹ راولپنڈی اور ڈسٹرکٹ ہاکی ایسوسی ایشن نے ٹورنامنٹ منعقد کرنے کا فیصلہ کیا ہے، انہوں نے بتایا کہ محمد اشفاق (مرحوم) ہاکی کے نامور کھلاڑی تھے جنہوں نے پاکستان کا نام دنیا بھر میں روشن کیا، وہ میکسیکو اولمپکس میں گولڈ میڈل جیتنے والی قومی ٹیم کاحصہ تھے، ایشین گیمز میں بھی انہیں گولڈ میڈل جیتنے کا اعزاز حاصل ہے، محمد یاسین نے مزید بتایا کہ ٹورنامنٹ میں راولپنڈی اور اسلام آباد کے رجسٹرڈ کلبز شرکت کریں گے جبکہ ڈراز کیلئے اجلاس 10 جنوری کو ہوگا، ٹورنامنٹ میں شرکت کے خواہشمند کلبز جنرل سیکرٹری ڈسٹرکٹ ہاکی ایسوسی ایشن شیخ علی عابد سے رابطہ کر سکتے ہیں۔
