راولپنڈی(جسارت نیوز)فیڈرل بورڈکے زیراہتمام انٹر ڈائریکٹوریٹ (اسکولز)کے ہم نصابی اور کھیلوں کے مقابلہ جات میں فیڈرل گورنمنٹ ایجوکیشنل انسٹی ٹیوشنزکینٹ گیریژن کے طلباء نے شاندار کارکردگی کامظاہرہ کیا۔ ایف جی پبلک اسکول نمبر2 بوائز طارق آباد کی ٹیموں نے بوائز ہاکی چیمپئن شپ اور باسکٹ بال مقابلوں میں میدان مار لیا۔ ترجمان ایف جی ای آئی ڈائریکٹوریٹ واجد مسعود کے مطابق فیڈرل بورڈکے زیراہتمام ہاکی ٹورنامنٹ کے مقابلے ہاکی گراؤنڈ آبپارہ میں منعقد ہوئے جن میں کل 8 ٹیموں نے شرکت کی۔ ایف جی پبلک اسکول نمبر 2 بوائز طارق آبادنے فائنل میں سلطانہ فاؤنڈیشن کو دلچسپ مقابلے کے بعد 2-0 سے ہرا کر ٹائٹل اپنے نام کیا جبکہ اسی اسکول کی باسکٹ بال ٹیم نے جناح ایجوکیشن سسٹم (جے ای ایس) ٹیکسلاکی ٹیم کو 30-26 سے ہرا کر مسلسل تیسری بار فائنل اپنے نام کر لیا۔ دوسری جانب شاعرمشرق علامہ اقبال کو خراج تحسین پیش کرنے کے لئے اے پی ایس میں ہونے والے بیت بازی کے مقابلے میں ایف جی پبلک اسکو ل (گرلز) لالہ زارکی ٹیم نے دوسری پوزیشن حاصل کی۔ مقابلے میں دوسرے نمبر آنے پرایف جی پبلک اسکول (گرلز)لالہ زارکی طالبات کو 3ہزارکیش اور علامہ اقبال کی تصانیف سے نوازاگیا۔ ایف جی ای آئی ڈائریکٹوریٹ کی انتظامیہ نے ہم نصابی اور کھیلوں میں نمایاں کارکردگی دکھانے پرایف جی پبلک اسکو ل نمبر2بوائزطارق آباد اور ایف جی پبلک اسکول(گرلز)لالہ زارکے پرنسپل،اساتذہ اور طلباء وطالبات کومبارکبادپیش کی ہے۔
